Shillong, Jylliew 13
Ka United Democratic Party (UDP), Pynursla Circle, ha ka Sngi Palei ka la pynpaw ïa ka jingsngewkhia halor ka jingjia ha kaba uwei u rangbah na ka shnong Pyrdiwah u la shah pynshitom palat pud ha ki briew ka aiñ.
Ha u kyrwoh khubor ba la pyllait ha ka Sngi Palei, u President ka UDP Pynursla Circle, u Bah Aihok Khongmalai, bad u General Secretary, u Bah Hame Khongsit, la ong ba katkum ba la paw lyngba ki lad pathai khubor, u Bah Solin Suting na ka shnong Pyrdiwah, u la shah leh tohmet ha ki pulit ha thanat Dawki, West Jaiñtia Hills. Ka jingkynnoh ka long ba kita ki pulit ki la pyndait da u ksew ïa une u rangbah uba la don kumba 70 snem ha ka rta.
Halor kane, ka UDP Pynursla Circle ka la pynrem jur ïa kane ka jingleh ki briew jong ka aiñ, bad ka la dawa ba dei ban tohkit bad ban ym pyllait ïa kiba ïaid palat ïa ka aiñ.
Katkum ki khubor, la kynnoh ba u Bah Suting u la mynsaw jur hadien ba u la shah pyndait da u ksew hapoh thanat Dawki.
Ki khubor ki la ïathuh ba u Bah Suting u la mih na shnong Pyrdiwah ban leit shna ïa ka kor tan um (pump) sha par maw ha ka thaiñ Nongtalang, hynrei u la shah bat noh ha ki pulit. La ong ba kita ki pulit ki la ïalam ïa une u rangbah sha thanat Dawki, bad ynda la poi ha thanat, ki la pyndait da u ksew ïa une u rangbah haduh ba u la mynsaw bad mong ha ki bynta jong ki kti bad ki kjat.
Ki bahaïing hasem, katkum ki khubor, ki la ïathuh ba u Bah Suting u dei ba shong ba sah ha Pyrdiwah kaba dang hap hapoh u pud u sam jong ka ri India, hynrei ka jingsuba ka long ba ki pulit ki la pynman ïa u ba u dei na Bangladesh.
