Shillong, Jylliew 13
Katkum ka khubor ba la ïohlum na ki pulit ha ka Sngi Palei, la ong ba ha ka 11 tarik Jylliew ha ka por kumba 9:35 mynmiet, uwei u briew ïa uba la tip kyrteng kum u Raju Sharma u la shoh la dat ïa uwei pat, u Budhi Sagar Morya ha Jhalupara, Shillong, bad ïa une uba shah shoh la hap ban rah sha Civil Hospital, Shillong hadien ba u la mynsaw malu-mala.
Ha kawei pat ka jingjia, u Dremsing Shadap u la ujor ba ha ka 10 tarik Jylliew, ki runar ki la leit prong ha ka PHE Pump House kaba don ha Umpling Dongsharum Block-IV, Shillong, bad ki la tuh ïa ki sainar kiba shongdor kumba T. 20,000.
Nalorkata, ki pulit ki la pyntip ba u N.P. Dey, General Manager, Meghalaya State Warehousing Corporation (MSWC), Shillong, u la ujor ba ha ka 10 tarik Jylliew, ki runar ki bym lah ban tip ki la leit rung sha kane ka shlem treikam bad ki la tuh ïa ki tiar ba pyndait ha paiñkhana bad ki sainar bording.
Shuh shuh ki pulit ki la pyntip ba ka Ravella Tanya Khongwir ka la ujor ba ha ka 10 tarik Jylliew, ki runar ki bym lah ban ithuh ki leit prong sha ka dukan jong ka kaba don ha Glory’s Plaza, Khyndailad, bad ki la tuh ïa ki mar ki mata kiba shongdor T. 6,500.
Na ka liang ki pulit ki la pyntip ruh ba u Kaileinthang Zou u la ujor ba ha ka miet jong ka 10-11 tarik Jylliew, ki runar ki la tuh ïa ka thuk-thuk jong u (ML-05Z-8630) na Madanrting Block-D.
Ki pulit ki la ïoh ruh ïa ka jingujor na uwei u nongshong shnong ba ha ka 31 tarik Jymmang, 2024, u la siew T. 25,000 sha uwei u paralok ba u la ïakynduh ha ‘Facebook’ ïa uba la ai kyrteng kum u Saroj Dorjee. Ïa kata ka pisa, utei u nongujor u la siew lyngba ka GPay, bad katkum ka jingïakut, u Dorjee u dei ban die ha utei u nongujor ïa ka kali, kaba la dep ban pyndonkam lypa. Hynrei haduh mynta, utei u nongujor u khlem pat ïoh ïa kata ka kali.
Nalorkata, ki pulit ki la ïathuh ba ka Jonata Hajong ka la ujor ba ha ka step jong ka 12 tarik Jylliew, ki runar ki la tuh ïa ka thuk-thuk jong ka (ML-05AA-8819) na ka ïing sah jong ka kaba don ha Lumbatngen, Law-U-Sib, Shillong.
Ka Presica N Marak ka la ujor sha ki pulit ba ha ka miet jong ka 27 tarik Jymmang, ki runar ki la leit prong sha ka ïing sah jong ka ha ka shnong Gulsora, South West Khasi Hills, bad ki la tuh ïa ki ksiar ki ksah bad kiwei.
Ha kawei pat ka jingjia, u Mostafizur Rohman u la ujor ba ha ka 11 tarik Jylliew ha ka por kumba 10 baje mynstep, u la lap ba u kwai uba don 6.5 quintal bad uba shongdor kumba T. 2.3 lak u la jah na ka kudam kaba don ha ka shnong Bollonggre kaba hap ha thanat Hallidayganj, West Garo Hills.
