Jowai, Jylliew:
Ka Synjuk Waheh Shnong Ri Jaiñtia (SWSRJ) ha ka 8 tarik Jylliew ka la pynlong ïa ka jingïalang pynskhem ïa ki nongkitkam na ka bynta ka samoi treikam jong u snem 2024-2027 ha ka jingdonlang u Myntri ka Sorkar Jylla, u Bah Kyrmen Shylla.
Nalor u Myntri la donlang ruh u EM ‘In-Charge’ Political, JHADC, Bah Finelyness Bareh, u Dolloi Elaka Jowai, Bah Puramon Kynjing, u BDO ka Thadlaskeiñ C&RD Block, Bah Brightstar Chyrmang bad BDO Namdong C&RD Block, Dr. Heimonmi Niang kiba la shah khot kyrpang ha kane ka sngi.
Ïa ka jingïalang kaba la long ha District Library Auditerium Mynthong, Jowai la pynïaid da u Waheh Shnong Sohphoh, Bah Mutshwa Thabah bad la ïoh ka jingkren pdiang na u General Secretary ka Synjuk bad Waheh Shnong Amlarem, Bah Kampher Pohlong.
U President ka Synjuk bad Waheh Shnong Pynthorlangteiñ, Bah Arminius Lipon u la ïathuh ïa ka khana mynbarim ka jingïaid lynti jong ka Synjuk naduh ba la seng ïa ka ha u snem 2011 halor ka thong ban ïada ïa ka ïap ka im jong ka jaidbynriew, ban pynim pynneh pynsah ïa ki dong ki shnong khamtam ha ki jaka khappud bad kiwei.
U Bah Kyrmen Shylla kum u kongsan ha ka jingkren u la ong ba ki nongmihkhmat paidbah kumjuh ki Waheh Shnong ki don ka bynta ka bakhraw ha ka imlang-sahlang bad u kyntu ban don ka jingïatreilang khnang ban kyntiew ïa ka roi ka par bad ka jingmyntoi jong u paidbah.
U la ong haka jingïaid lynti jong ka jingim, ka jingbha bad ka jingsniew ka ïaid ryngkat-ryngkat hynrei ka shong pat ha u/ka kumno ban pyndonkam ïa ka, da kaba ai nuksa ïa ka Wah Myntdu bad ka kam tih dewïong.
U la ong ka Wah Myntdu shisien peit ka um ka la kylla jakhlia hynrei lada phai sha ka jingbha jong ka, ka la ai jingmyntoi ïa ki nongrep, ki nongkhwai dohkha bad kiwei-kiwei, kumjuh ruh ka jingsniew jingbha ba mih na kam tih dewiong da kaba u la ai nuksa ïaka jingmih u Dr. Kampher Pala kumjuh ma u (Kyrmen Shylla) dei lyngba ki krem dewïong.
Hynrei u la kyntu pat ba haba trei ba ktah dei ban pyndonkam da kaba phikir khnang ban ym ktah ïa ka mariang bad ka pateng ban wad.
Shuh shuh u Myntri u la kyntu ïa baroh ki Waheh Shnong ba horkit hordang kim dei ban shah pynïaid ha ki nongmihkhmat paidbah ne ai lad ïa ki ban leh donbor ne tuklar ha ki Shnong ki thaw jong ki.
Kiwei de kiba la ai jingkren ki long u Bah Finlyness Bareh, Bah Roilak Suchiang, Waheh shnong Mulieh, Bah Firmly Rymbai, Waheh Shnong Lakadong, u Assistant Secretary Synjuk ki Nongsynshar Shnong ka Bri Hynniewtrep Bah J.L. Khongshei.
La pynphuh pynphieng iaka jingïalang da ki jingshad tynrai ba la shim bynta da ki samla ka shnong Mookaswan, Nongjngi bad Sabahmuswang.
Ki nongkitkam ki long u Bah Arminius Lipon, Waheh Shnong Pynthorlangteiñ kum u President, Bah Kampher Pohlong, Waheh Shnong Amlarem kum u General Secretary, Bah Tellme Phawa, Waheh Shnong Sabahmuswang kum u Finance Secretary bad u Damon Dkhar, Waheh Shnong Modop Nartiang kum Publicity Secretary.
