Shillong, Jylliew 13
Ka National People Youth Front (NPYF) ha ka Sngi Palei ka la leit ban dawa na u Symbud Myntri Rangbah ka jylla u Bah Prestone Tynsong uba khmih ruh ïa ka tnat Kam Pohïing (Police) ba dei ban pynshitom da kaba tyngeh ïa ki pulit kiba pyndait da u ksew ïa u rangbah ha Dawki.
Ha ka jingïakynduh ïa u Bah Prestone, ka NPYF ka la dawa ba ïa ki pulit ka thanat Dawki kiba donkti ban kynshu ïa ki ksew ban leit dait ïa uwei u rangbah bad kiba la bom la tied ruh ïa une u rangbah haduh ba un da mynsaw tang namar ka jingsuba ba u dei u nong Bangladesh dei ban pynshitom da kaba tyngeh.
Haba kren sha ki lad pathai khubor hadien ba la dep ban ïakynduh ïa u Bah Prestone, u Bah Kitborlang Nongrem uba dei u President ka NPYF u la pynrem jur ïa kane ka jingleh ki pulit tang namar ba suba sniew ïa utei u rangbah.
U la pyntip ba ha jingïakren, u Bah Prestone u la kular ba un sa phah ïa u SP ka West Jaiñtia Hills ban tohkit ban lap ïa ka jingshisha bad ban pynshitom ïa kito ki pulit kiba donkti ban bom ïa utei u rangbah.
U Bah Solin Suting uba dei u nongsumar dawai kynbat na ka shnong Pyrdiwah kaba don marjan bad ka Dawki ha khappud bad ka Bangladesh, ryngkat bad lai ngut ki paralok ki la shah rah sha thanat bad shah bom shah tied haduh ban da mynsaw tang namar ka jingshah suba sniew.
