Shillong, Jylliew 13
Ka Kong Grace Mary Kharpuri kaba long ka Executive Member (EM) hapoh ka Khasi Hills Autonomous District Council (KHADC) bad ka MDC ka NPP na Nongshken Constituency, ka la ong ba kam don jingtieng eiei ïa ka ilekshon naba ka dei ha u paidbah ban bishar bad ai ïa ka rai.
“Ngam don satia ka jingtieng bad nga la long kaba la pynkhreh lada pynlong ilekshon MDC ha kano-kano ka por. Nga la trei shitom ha ki jinglong MDC ki jong nga, bad nga sngew ba kan dei pat ka pali jong u paidbah ban bishar,” la ong ka Kong Grace haba kren bad ki lad pathai khubor ha ka Sngi Palei.
Kane ka MDC na Nongshken ka la ong ba ki la mih bad don ki jingkynthoh ba ka Sorkar ka la tieng ban pynlong ïa ka ilekshon MDC bad ban dang bteng ban pynjlan sa hynriew bnai. “Ym dei satia ba ma ngi kum ki MDC baroh ngi tieng ban leit sha ka ilekshon hynrei dei namar ba ka don ka jingkyrpad na ki katto katne ki constituency kiba wan ban pynsngew ba la donkam ban pynbeit thymmai ïa ki, ha kaba ïadei bad ka jingïar ka constituency ba donkam ban kham pynrit noh. Halor kane, la thaw ïa ka Delimitation Committee bad ka jingpynjlan ruh ka la wan hadien ka jingai jingmynjur jong u Lat ïa kane ka committee ban pynïaid shakhmat ïa ka kam,” ka la ong.
Ka Kong Grace Mary ka la kyntu ïa ka Sorkar lyngba ka tnat District Council Affairs (DCA) ban pynkloi noh ïa ka ilekshon, hadien ba la ïoh ïa ka kaiphod na ka Delimitation Committee. Ka la ong ba lada ka ilekshon ka long noh mynta mynta ruh kam sheptieng, da kaba bynrap ba ka ilekshon ka shong ha ki paidbah ban bishar ym ha kiba ïakhun pyrshah. Ka la ong ba kum ka MDC ka la trei shitom ha la ka bor ba la ai, bad pynpaw ka jingsngew shaniah ha ki paidbah.
Ha kawei pat ka liang, ka Kong Grace ka la ai ka jingkhublei kitbok ïa ki ar ngut ki MP kiba dang shu shah jied thymmai, kata u Dr Ricky AJ Syngkon na Shillong bad u Saleng A Sangma na Tura, bad pynpaw ka jingkyrmen ba kine ki MP bathymmai kin lah ban rah ïa ki mat ka Jylla ha Parliament.
