Shillong, Jylliew 13
Ki seng saiñ pyrthei ha kane ka Jylla ki la sdang ban wad kyrtong na ka bynta ka ilekshon MLA shiteng samoi na Gambegre konstitwensi ha kaba ki lai tylli ki seng kiba kynthup ïa ka Congress, National People’s Party (NPP) bad Trinamool Congress (TMC) kin long ki seng kiba hakhmat eh ban sei kyrtong.
Ka Gambegre konstitwensi kaba la mihkhmat da u MP ka Tura, u Saleng A Sangma kum u MLA ha ki 11 snem tam, ka la sah thylli mynta hadien ba u Saleng u la iehnoh kam ha ka 10 tarik mynta u bnai.
Haba ïakren bad ki nongïalam ka Congress, ki la ong ba ka kam ban wad kyrtong ka la nang ïaid bad da kaba phylliew jingmut lang bad u MP ka Tura yn sa jied ïano ban pynïakhun ha ka ilekshon MLA shiteng samoi.
Ka NPP kam pat tikna la kan phah ïakhun da u Myntri Sorkar barim u James PK Sangma lane da ka kurim u Myntri Rangbah ka Chandee A Sangma, hynrei la ong ba jingwad kyrtong ka dang ïaid bad yn sa jied bad pynbna ynda la dei ka por.
Ka TMC ruh ka dang kheiñ dang diah la ka biang ne em ban buh kyrtong ban ïakhun ha kane ka ilekshon MLA shiteng samoi na Gambegre khamtam hadien ba la ïohi ia ka jinghiar ka vote ha kane ka MP ilekshon.
Hynrei la ong ba ka Sadhiarani kaba dei ka kurim jong u MLA barim, u Zenith Sangma ka dei ruh kaba la ju ïakhun teng na Gambegre pyrshah ïa u Saleng, bad ka TMC ka lah ban phah ïakhun biang ha ka ilekshon MLA shiteng samoi.
U Saleng u la shahjied kum u MLA ka Gambegre konstitwensi naduh ka ilekshon MLA ha u snem 2013, 2018 bad 2024. Ha u snem 2008, u Saleng u la shahjied nyngkong eh kum u MLA ka Congress na Dalamgiri kaba dei ka konstitwensi barim.
