Khliehriat, Jylliew:
Ka jingïalap ne ka ‘Campaign’ ban ïakhun pyrshah ïa ka jingkhaïi ïa ki khynnah la pynlong da ka National Commission of Protection of Child Rights (NCPCR) ryngkat ka jingïatreilang bad ka State Commission For Protection of Child Rights (SCPCR) bad ki bor pyniaid distrik jong ka East Jaiñtia Hills ha Conference Hall ka ophis u DC ha ka Khliehriat.
Ha kane ka jingïalang la donlang ka Additional Deputy Commissioner ka East Jaiñtia Hills District, Kong J.U. Kharpuri, Assistant Commissioner F. Wann, ki heh pulit, ki ophisar na ka tnad Social Welfare, koit ka khiah, pule-puthi bad tnad Labour, ki dkhot Child Welfare Committee, ki khlieh nongsynshar shnong, ki Principal jong ki skul bad kiwei-kiwei.
Ka Kong J.U. Kharpuri haba kren halor ka jingdonkam ban ïakhun pyrshah ïa ka jingkhaïi ïa ki khynnah, ka la khot ka jingïatreilang na baroh kynthup naduh ki pulit, ki ophisar Sorkar, ki nongïalam shnong, ki jaka pule ban ïakhun pyrshah ïa kane ka kam.
Ka ‘riew shemphang, WP SI. Kong Opaia Tyngkan lyngba ka Power Point Presentation ka la kdew ïa ki hok bapher-bapher jong ki khynnah katkum ka Riti Synshar ka ri India, nalorkata ka la batai ruh halor ka Protection of Children from Sexual Offences (POCSO) Act, 2012, the Prohibition of Child Marriage Act, 2006, the Child Labour (Prohibition and Regulation) Act, 1986, bad ka Juvenile Justice (Care and Protection of Children) Act, 2015.
