Shillong, Jylliew 13
Ka shuki President jong ka Meghalaya Pradesh Congress Committee (MPCC) ba ju bat da u Bah Vincent Pala ka la sdang ban shong synjor hadien ba u la shah rem noh ha ka ilekshon MP Lok Sabha na Shillong constituency ba dang shu dep.
Katkum ki khubor ba la ïoh lum la ïathuh ba ki nongkitkam kiba hakhmat jong ka seng Congress ha Meghalaya ki la sdang ban ïakren ba dei ban jied President thymmai noh da uwei khnang ban thaw thymmai ïa ka seng Congress shwa ban wan ka ilekshon MDC ha KHADC bad JHADC.
Ki khubor ki ïathuh ba ka jingrem kput ka Congress na Shillong constituency ka daw ka dei ba ki paidbah kim sngewtynnad ïa ka Congress namar kim mon shuh ïa u Bah Vincent Pala.
Shuh shuh ki khubor ki ïathuh biang ba ka jingmih noh jong khatar (12) ngut ki MLA ka Congress hapoh ka jingïalam u Dr. Mukul Sangma ha ki snem ba la dep ka dei naduh ba shimti u Bah Vincent Pala kum President kat haduh ba pynlong ïa kane ka seng ban hiar ha ka ilekshon MLA 2023.
Nalor nangta ki khubor ki ïathuh ruh ba ka jingieid ki paidbah ïa ka Congress ka pyni shai kdar ba ha rilum Garo ki dang ieid ïa ka seng bad ha rilum Khasi ruh ki dang ieid namar ki don ki constituency ki bym don nongkitkam shuh, hynrei ki paidbah ki dang ai jingkyrshan ïa ka seng.
Ki khubor ki ïathuh ba lada la lah ban weng ïa u Bah Vincent Pala kum u President ka Congress ha Meghalaya, ka seng sa shisien kan khlaiñ biang namar kito ki MLA kiba la phet ruh kin sa wanphai biang.
U Bah Vincent Pala uba la jop lai sien kum u MP na Shillong constituency na ka seng Congress, ha kane ka ilekshon MP kaba dang shu dep u la shah rem da kaba ïoh tang 199168 vote, katba u Dr Ricky AJ Syngkon uba la jop na ka seng VPP u la ïoh 571078 vote.
