Nongpoh, Jylliew 13
Ha kawei ka jingjia shah thok pisa, uwei u rangbah uba la tip kyrteng kum u Bah Forgive Dkhar u la leit ban buh jingujor sha ki pulit hadien ka jingshah thok ha ka kawei ka longkmie kaba la tip kyrteng kum ka Ailynti Lyngdoh na ka jingthied ïa ar tylli ki jaka ha Pynthor Bhoilasa kaba la kot sha ka T. 88 lak.
Katkum ka khubor ba la ïoh lum na ki pulit, la ïathuh ba u Bah Forgive Dkhar u la thied shwa nyngkong ïa kawei ka jaka na katei ka longkmie kaba shongdor kumba T. 66 lak bad kaba don ïa ka jingheh 18 akar ha ka 2 tarik u Nailar, 2023.
Da ka jingbym poi pyrkhat ban shah thok shah shukor bad da ka jingmut kaba khuid, utei u rangbah ha ka 6 tarik u Naitung, 2023 u la leit ban thied biang sa kawei ka jaka na katei kajuh ka longkmie ha ka dor T. 22 lak ha ka jingheh kumba 15 akar.
Utei u rangbah u la ïathuh ba un sa sngewthuh ba u la shah thok shah shukor ha katei ka Kong Ailynti Lyngdoh dei tad haduh ka 15 tarik jong u Jymmang, 2024 hadien ba u la ïoh jingtip ba kitei ar tylli ki jaka kiba u la dep thied ki dei pynban kiba long trai da kiwei pat ki briew.
