Shillong, Jylliew 13
Ka Sorkar Pdeng ka la pyntip sha ka Supreme Court ba ka la rai ban weng noh ïa ki ‘mark’ sngew synei kiba la ai sha ki 1,563 ngut ki samla pule kiba thoh ïa ka eksamin NEET (UG) bad kine ki samla ki hap ban thoh eksamin biang ha ka 23 tarik mynta u Jylliew.
Hynrei ka Supreme Court ka la ong ba lada don napdeng kine ki 1,563 ngut ki samla ki bym treh shuh ban thoh ïa ka eksamin NEET, dei ban kheiñ tang ka mark kaba ki ïoh ha ka eksamin kaba la dep ym ban kheiñ lang ïa ka mark sngew synei (grace mark) kaba la ai ïa ki.
Ka jingpynbna ïa ka result jong ka eksamin NEET ka ban sa pynlong biang kan dei ha ka 30 tarik Jylliew.
Ki samla pule kiba kwah ban leit pule doktor kaba kynthup ïa ka jingpule MBBS, BDS, AYUSH bad kiwei kiwei kin hap ban pyndep shwa ïa ka NEET.
Hynrei ha ka eksamin NEET kaba la pynlong dang shen ha baroh kawei ka ri, ka la don ka kynrum-kynram namar ba ki don haduh 1,563 ngut kiba shu ïoh ‘mark’ sngew synei ba la ai da ka National Testing Agency (NTA) ha kaba la don 67 ngut ki samla pule kiba ïoh ‘mark’ mar katjuh kata mar 720 mark.
Kane ka la wanrah ka jingsuba sniew na kiba bun ki samla pule ha kaba la mih ruh ka jingïakhih ban dawa pynbeit ïa kane ka jingmih ka kynrum-kynram.
Hynrei ka Sorkar kam shym la ong eiei la kan pynlong eksamin NEET biang ne em na ka bynta ki samla pule ha Meghalaya namar ka la mih ka kynrum-kynram ha kaba ki samla kiba thoh eksamin NEET ki ïoh da ki jingkylli kiba bakla ha jaka thoh eksamin ha Jowai bad Nongpoh ha ka 5 tarik u Jymmang, 2024.
