Shillong, Jylliew 14
U General Secretary ka United Democratic Party (UDP), Bah Jemino Mawthoh, u la ïathuh ba ka seng ka la aiti haduh phra tylli ki jingai jingmut halor ka bhah thungkam thungjam sha ka Expert Committee.
Haba ïakren bad u Bah Jemino u la ïathuh ba ka UDP ka la leit ban aiti sha ka Expert Committee ïa ki phra tylli ki jingai jingmut da ka jingthoh ha ka 13 tarik Jylliew 2024.
“Ngim pat lah ban pynpaw pyrthei ïa kine ki phra tylli ki jingai jingmut namar ngim kwah ban ktah ïa kiwei ki jaidbynriew kaba ngi la sahlang hapoh ka jylla hynrei ngin sa pyni paidbah ha kine ki sngi” u la ong.
Nalor kane u la pyntip ruh ba ka UDP ka la dep aiti ïa kine ki juh ki jingai jingmut sha ka sorkar jylla ha ka 14 tarik Naitung 2023 ha ka Kong Ampareen Lyngdoh kaba dei ka Chairperson jong ka Reservation Committee mynshem snem.
Shuh shuh u la ïathuh ba ïa kine ki juh ki jingai jingmut la leit ban rah biang mynta u snem sa ha ka Expert Committee.
“Halor ka bhah thungkam thungjam kum ka seng ngi la shong jingïalang haduh khatsaw (14) sien ryngkat ki ophisar sorkar, ki stad aiñ bad ki ‘riew shemphang khnang ba kaei kaba ngi ai jingmut kan long ka bym ktah ïa kiwei ki jaidbynriew” u la ong biang.
U Bah Jemino u la ïathuh ba ha kane ka bhah thungkam thungkam kan ïaid beit ïaid ryntih khlem da ktah ïano- ïano.
Kum ban shu pynkynmaw, ïa kane ka Expert Committee la thaw da ka sorkar jylla hadien ba ka Voice of the People Party (VPP) lyngba u President, Bah Ardent Miller Basaïawmoit ka la pynlong ïa ka jingshah thngan ha Additional Secretariat mynshem snem ban dawa pynbeit thymmai biang ïa kane ka bhah thungkam thungjam katkum ka jingdon briew.
