Shillong, Jylliew 14
U Chairman ka Expert Committee on Reviewing of State Reservation Policy u la khot ïa ki paidbah ban ai jingmut halor ka jingpeit biang ïa ka Reservation Policy lyngba ka Public Notice MIPR 0063 tarik 01.05.2024.
I samla Kitdor Blah i la ai ïa ki jingmut sha kane ka Expert Committee ha ka Sngi Thohdieng katkum ki jingpynshai ba i la ai shi snem mynshuwa ha ka jingïakren bad U Nongsaiñ Hima kaba la mih ha ka YouTube Channel jong U Nongsaiñ Hima ha ka 19 tarik Jylliew, 2023.
Katkum kane ka jingai jingmut, i samla Kitdor i la ban biang ba dei ban pyntreikam ïa ka Reservation Policy da kaba pyndonkam da ka ‘Post-based Roster’, ym da ka ‘Points-based Roster’. Kum ban shu bynrap, katkum ki jingngam jylliew jong i samla Kitdor, i la pynshai ba ka ‘Post-based Roster’ kan pyntreikam hok ïa ka Para 3 jong ka Resolution tarik Kyllalyngkot 12, 1972 kaba kren ïa ka ‘fraction’ lane bynta jong ka bhah thungkam na ki ‘post’ lane ki kam kiba lait ha kano-kano ka snem. Ka ‘100 points Roster’ kan ym lah ban pyntreikam ïa ka para 3 jong kane ka Resolution namar kam shim jingkheiñ ïa ki ‘fraction’ kane bynta, hynrei ka ïaid beit katkum kita ki ‘100 points’ kiba la ‘plot’ lane mang lypa.
Nangta, ha kane ka jingai jingmut sha ka Expert Committee, i samla Kitdor i la bynrap biang ba ka ‘100 points roster’ kan wanrah biang ïa ka ‘Retrospective’ lane ‘Compensatory Method’ namar ka rah shakhmat ïa ka bhah kam bym lah pyndap, katkum ka Recruitment Cycle jong kita ki ‘100 point’ kiba ïai tyllun khlem kut. Ka ‘Post-based Roster’ kan ym shim ïa kane ka ‘Recruitment Cycle’ bad kan rah shakhmat ïa ki bhah bym lah pyndap tang shi ne ar ‘Recruitment Year’ katkum ka para 2 jong ka Resolution.
Nalor kane, i samla Kitdor i la pynpaw ba ka bhah thungkam ïa ki Scheduled Tribe ka dei ban ïaid beit katkum ka jingdon paid, bad ïa kane la pynshisha bad kyrshan da ka Ministry of Home Affairs vide Resolution No. 27/25/68-Estt. (SCT) dated 25.03.1970; DoPT O. M. No. 36011/33/81-Estt (SCT) dated 05.10.1981; DoPT Brochure on Reservation for SCs & STs, 1993, Chapter 2; Ministry of Heavy Industries & Public Enterprises (MoHI&PE) ‘Reservation Brochure’ No. DPE-GM-/0001/2016-GM-FTS-5921 dated 17.10.2016, ha ki para 2.1 bad 2.3; lem bad ka Resolution No. PER.222/71/138 dated 12th January, 1972 kaba dei ka Reservation Policy jong ka jylla hi, kaba kren shaphang ka Representation lane jingbhah kam _”in terms of their population” lane katkum ka jingdon paid. Shuh shuh, i samla Kitdor i la bynrap ruh ba ka jingrai jong ka Supreme Court ha u snem 1992 ha ka mukotduma jong ka Indra Sawhney ka la pynskhem ba ka jingbhah kam jong ki Scheduled Tribe ka dei ban long katkum ka jingdon paid namar ba wat la ka la buh ïa ka jingbhah kam hapoh ka 50%, kane ka dei ban buh pud ïa ka bhah thungkam jong ki OBC hapoh ka 27%.
Kane ka jingkheiñ 27% bad 50% ka la mih ynda haba la dep buh jingkheiñ ïa ka bhah thungkam jong ki Scheduled Tribe bad Scheduled Caste kaba long 7.5% bad 15% kaba dei ka jingkheiñ katkum ka jingdon paid jong ki ha ka Ri India hadien ka Census 1961. Kane ka jingrai jong ka Ïingkashari ka khlem pynkheiñ ïa ka jingbhah kam ïa ki Scheduled Tribe katkum ka jingdon paid, hynrei ka la bteng ïa kata bad kumta, ka la pynskhem ïa kata ka juh.
Shuh shuh, i samla Kitdor i la ong ba kane ka juh ka jingrai jong ka Ïingkashari ka la pynskhem ba ïa ka jingsahdien jong kino-kino bad baroh hi ki Scheduled Tribe, ym dei ban dang hap buh jingkylli ne buh jingthew katkum ka ïoh ka kot, ka imlang ka sahlang, ne ka pule ka puthi ka jong ki. Kumta, kam long kaba dei ban bhah kam kham bun ne kham duna ïa kawei ka kynhun Scheduled Tribe ban ïa kawei pat hapoh ka jylla, ne ban don kita ki Creamy Layer lane Economically Weaker Section namar kine ki buh jingkylli ïa ka hok jong uno-uno u para Scheduled Tribe ban ïoh bynta ha ka bhah thungkam, kaba long pyrshah ïa katei ka jingrai jong ka Ïingkashari. Halor kine ki mat, i samla Kitdor i la ai jingmut ba ka Sorkar Jylla ka dei ban pyndonkam ïa ka iktiar katkum ki Article 15(4) bad 16(4) jong ka Riti Synshar ban ai beit ïa ka bhah thungkam ha ka jylla (State level) ïa ki Scheduled Tribe ka jylla katkum ka jingdon paid jong ki, bad ha ki distrik pat (District level), 100% katkum ki Scheduled Tribe kiba long trai, kata Khasi lane Garo.
