Shillong, Jylliew 14
U nongïalam ka National People’s Party (NPP) bad Myntri ka Sorkar Jylla, u Rakkam A. Sangma u la ong ba jingkyrshan ka seng ïa ka National Democratic Alliance (NDA) ha ka Sorkar Pdeng ka long na bynta ka bit ka biang ha ka synshar-khadar.
“Ngi long shi bynta jong ka NDA. Ngi donkam ïa ka jingkyrshan ka Sorkar India bad kumta khlem ka jingkyrshan ka Sorkar India, yn ym lah thaw pyrthei eiei hapoh ka Jylla namar ka jingpynmih khajna ruh ka duna shaba palat,” la ong u Sangma haba kren sha ki lad pathai khubor ha ka Sngi Thohdieng.
U la ong, “Kumta na bynta ka bit ka biang ha ka synshar-khadar, ngi don bynta lang bad ka NDA bad ngin ïai bteng ban don hapoh ka NDA.”
La ka jingïadei bad ka BJP kan ktah ne em ïa ka NPP, u Myntri u la ong ba ka kaei kaba la jia, ka jia na bynta ka jingbha bad ka seng kan ïai trei minot bad pynbha ïalade nangne shakhmat ha ki sngi ban wan.
Kum ban shu kdew hangne, u MLA ka BJP na South-Shillong, Bah Sanbor Shullai ha kine ki khyndiat sngi ba la dep, u la ong ba ka jingïadei hapdeng ka BJP bad ka NPP kan dang bteng ïa mynta wat la ha ka saiñ pyrthei ym lah ban ong lypa kaei ka ban jia hadien-habud.
Haba kylli, u Sangma u la ong, “Kane ka jingsaphriang ka lah ban long kaba thok, ka lah ban dei kaba shisha, ngam tip, bad ngam don jubab eiei halor kine.”
Halor ka jingpynïeng kyrtong na Gambegre, utei u nongïalam u la ong ba um don ïa ka jubab halor kane ka bynta bad ka por kan sa batai ïa kine kiei-kiei baroh bad hap ban long kiba ïaishah.
U la ong ruh ba ïa kane ka kam yn sa shai hadien ka jingshim rai u President ka seng, u Conrad K. Sangma wat la u la pyntikna ba ka NPP kan ïakhun beit ha kane ka ilekshon shiteng samoi na Gambegre konstitwensi.
Halor ki jingkynnoh ba ki nongïalam bad nongmihkhmat ka NPP ha Ri-lum Garo ki pyrshah ïa u James Sangma ban ïakhun na Gambegre, u Sangma u la ong, “Em, kam don eiei kaba kum kata, ngi don bun bah ki nongïalam kiba la ih ban ïakhun na Gambegre…ap ïa ka por.”
Ki khubor ki kdew ba ki nongtrei ka NPP ha Ri-lum Garo ki la ai jingmut ïa ki kyrteng jong u Myntri barim ka Jylla, u James P.K. Sangma bad ka kurim u Myntri Rangbah ka Jylla, ka Mehtab Chandee kum ki kyrtong na bynta ka ilekshon shiteng samoi ha Gambegre.
Kum ban shu kdew hangne, kane ka konstitwensi ka la sah thylli khlem nongmihkhmat hadien ka jingiehnoh kam u MLA, u Saleng Sangma uba la poi sha ka thong ha kane ka ilekshon ba la dep sha ka Lok Sabha bad kiew kyrdan kum u MP hadien ba u la pynrem ïa ka kyrtong ka NPP, ka Agatha K. Sangma.
