Nongstoiñ, Jylliew 14
U Dr. G.H. Chyrmang, MFS Member Secretary ka Meghalaya State Pollution Control Board (MSPCB) u la ong ba ka Wah Nonbah ka la don ha ka kyrdan basaw jong ka jingjaboh ha ka jingithuh jong ka NGT hynrei u la ong pat ba ka dang don ka jingkyrmen bad kam pat dier ka por.
Ïa kane na ka liang u Dr. Chyrmang u la kren kum u kongsan ha ka jingïalang ai jingpyshai halor ka phang ‘Single Use Plastic ‘ kaba la pynlong da ka MSPCB ryngkat ha ka jingïatreilang bad ka ophis u DFO, Nongstoiñ bad ka Alliance for Sustainable Green & Clean Nature (ASGCON) kaba la long ha ka 13 tarik u bnai Jylliew 2024 ha Bishop Hall, Nongstoiñ.
U Kongsan u la pynkynmaw ruh ïa ka jinglong-jingman jong ka mariang mynta ka la long shisha kaba sniew namar ka la dap sa tang da ki jaboh bad ki wah kiba khuid ba suba kiba dap bad jngi da ki dohkha mynta ki per sa tang da ki plastik bad ha ka por lyïur ki la sahkut bad khang ïa ki nala um bad ki wah.
U Dr. Chyrmang u la pynsngew ruh ba na ka liang jong ka tnad ka don ïa ki lad ki lynti ban wanrah ïa ka jingkylla sha ka jingpynitynnad ïa ka mariang hynrei ka donkam ïa ka jingïasnohkti lang jong ki paidbah.
U la kyntu ruh ba kin kyndit bynriew noh na ka bynta kumno ban wanrah ïa ka mariang, ki wah, ki lum kiba khuid.
Ha kane ka sngi, u Pa’iem E.P. Syiem, Syiem ka Hima Nongstoiñ u la long kum u Symbud Kongsan ha ka jingdonlang u Dr. S. Diengngan MFS, ACF, Nongstoiñ, u Bah F.S.Wan na DFO Nongstoiñ.
La wan ban ïashim bynta ruh da ki skul, kolej, NSS Nongstoiñ College, ki Principal, ki nonghikai,ki nongsynshar shnong, ki longkmie-longkpa, ki samla, ki ophisar na ki tnad Sorkar bapher-bapher kynthup ïa ki nongtrei ka tnad khlaw, ki dkhot ka ASGCON bad kiwei-kiwei.
Ha katei ka jingïalang ai jingpyshai, ki ‘Resource Person’ kiba la ai jingkren ki kynthup na ka tnad PHE, MSPCB, Shillong bad na u Bah Erick Charles Kharsyntiew, Project Coordinator, ASGCON bad la ïoh ruh ïa ka jingkren na u Bah Thymmaibor S. Shangrit, Chairman ASGCON.
La pynshit pynshngaiñ ruh ïa katei ka sngi da ki jingrwai na ka kynhun Khmih Creative Society Nongstoiñ bad nongrwai na Shillong.
