Khliehriat, Jylliew:
Ka shlem treikam u District Transport Officer, East Jaiñtia Hills ryngkat ka jingïatreilang bad ki bor pynïaid distrik jong ka East Jaiñtia Hills ha ka 12 tarik Jylliew ki la pynlong ka jingïalang pynshai paidbah halor ka jingdonkam ban ïada ïa ka jingkieng Ri-Manar kaba don ha ka shnong Samasi kaba hap hapoh Sutnga Block.
Ha kane ka jingïalang la donlang u District Transport Officer (DTO) ka East Jaiñtia Hills District, Bah P. Laloo, u Motor Vehicle Inspector (MVI), Bah H. Dkhar, u Enforcement Inspector, Bah K. Tynsong, u Junior Engineer, Public Works Department (PWD), NEC Sutnga, Bah L. Shadap, u Dolloi ka Elaka Sumer, Bah K. Mannar, ki Waheh Shnong, ki nongshong shnong bad kiwei-kiwei.
U Bah H. Dkhar ha ka jingkren u la pynpaw ka jingsngewkhia halor ka jinglong-jingman jong ka jingkieng da kaba pynsngew ruh ïa kiba bun ki daw kiba ïalam sha ka jingtlot jingsynjor jong ka jingkieng, nalorkata u kyntu ruh ïa ki nongñiah kali ban ym kit palat pud haba ïaid lyngba kane ka jingkieng khnang ban lait kano-kano ka jingjia.
Shuh shuh u la ban ïa ka jingdonkam ban ïada ïa kane ka jingkieng namar ka long u budlum ïa ki paidbah jong kane ka thaiñ bad kyntu ruh ban ïatreilang bad ka tnad Transport, PWD bad pulit bad ban rah ïa ka khubor sha ki paidbah khamtam sha ki nongñiah kali ban ym kit palat pud haba ïaid lyngba kane ka jingkieng.
Kiwei de kiba la ai jingkren ki long u Junior Engineer (JE), Public Works Department (PWD), NEC, Sutnga, Bah L. Shadap, Daloi, Elaka Sumer Bah K. Mannar, u Waheh Shnong Samasi, Bah B. Pasleiñ, Waheh Shnong Mynthlu, Bah N. War bad Waheh Shnong Kremmyrsiang, Bah H. Nongsiej.
