Nongpoh, Jylliew 14
Ha kawei ka jingjia kylla kali ha ka step phyrngab jong ka Sngi Thohdieng, la ïathuh ba 2 ngut ki briew ki la duh noh la ka jingim hadien ba kawei ka kali kaba ki shnong ka la leit ban tyngkhuh ïa u jingpynïakhlad (median divider) jong ka surokbah National Highway 6 hajan jong ka Civil Hospital, Nongpoh kat haduh ba kan da kynthih sha shiliang surok bad kylla khongpong hapdeng ka surok.
Katkum ka tyllong khubor ba la ïoh lum na ki bor pulit, la ïathuh ba katei ka jingjia ka dei kaba la jia ha ka por kumba 1 baje mynstep jong ka 14 tarik u bnai Jylliew, 2024 ha kaba kawei ka kali kaba don ïa u nombor ML 05N0174 kaba la ñiah da u Bah George Kharkongor ka dei kaba la ñiah khlemakor bad pynher sted bha bad kaba dang hiar sha ka nongbah Guwahati na Shillong.
Ki bor pulit, ki la ïathuh ba ha katei ka kali kaba la ñiah da u Bah George Kharkongor na ka shnong Nongrah, East Khasi Hills, la don sa 3 ngut kiwei pat kiba ïadon lang, ïa kiba la tip kyrteng kum u Banrap Marboh na ka shnong Mawlynrei, East Khasi Hills, u Frick Kharkongor uba dei na kajuh ka shnong bad utei u nongñiah, lem bad u Bah Leuwis Kharkongor na ka shnong Lapalang, East Khasi Hills. Ha shuwa ka jingwan poi jong ki bor pulit, la ïathuh ba ïa 3 ngut na kitei kiba mynsaw kynthup ïa u nongñiah, la pynkit noh da ki briew kiba sakhi ïa katei ka jingjia sha Nongpoh Civil Hospital na ka bynta ban ïoh ïa ka jingsumar, katba ïa u Bah Banrap Marboh uba la thiah lyngktar ryngkat ka jingphlei snam bad ym tip briew shuh la pynkit pat da ki bor pulit sha Civil Hospital Nongpoh, ha kaba ki doktor ki la pynbna ba u la dep khlad lypa.
Shuh shuh, ka khubor na ki pulit ka ïathuh ba katkum ka kaiphod jong ki doktor, la ong ba napdeng kitei ki 3 ngut kiba mynsaw, u Bah Leuwis Kharkongor u dei uba shu mynsaw malu-mala katba u Bah Frick Kharkongor u dei uba la jur ka jingmynsaw bad kumta la pynkynriah noh sha Civil Hospital, Shillong.
Ki bor pulit ki la ïathuh ruh ba hadien kumba katto-katne por, la ïoh jingtip pat ba u Bah Frick Kharkongor ruh u la khlad noh ha Civil Hospital Shillong.
Na ka liang ki bor pulit, ki la rah noh ïa katei ka kali kaba ngat ha katei ka jingjia sha ka thanat Nongpoh na ka bynta ban pyndep ïa ka jingtohkit bad kiwei de ki jingdonkam katkum ka aiñ.
