Shillong, Jylliew 14
Ka Hynñiewtrep Youths’ Council (HYC) sengkmie ha ka Sngi Thohdieng ka la leit ban buh da ka jingthoh kaba don haduh 12 tylli ki jingai jingmut ha ka shlem treikam jong ka Expert Committee ban ai jingmut halor ka ‘Reserva-tion Policy’ ne ka bhah thungkam-thungjam.
Ka jingleit jong ka seng ban buh da ka jingthoh ka long hadien ba na ka liang jong ka sorkar jylla lyngba ka Expert Committee ka la phah sha kiba bun balang ban ai ïa ki jingmut jong ki ha kaba ïadei bad ka ‘Reservation Policy’ hapoh ka jylla.
Haba ai jingkren sha ki lad pathai khubor hadien ba la dep wan buh ïa ki jingai jingmut, u President ka HYC, u Bah Roykupar Synrem u la ong ba ka seng ka la pynsngew haduh 12 tylli ki jingai jingmut sha ka Expert Committee ha kaba ïadei bad ka jingdonkam ban pynkylla noh ïa ka bhah thungkam-thungjam.
U la ong ba ka seng ka la pynpaw ha ka Expert Committee ba kumba ka long, ka bhah thungkam-thungjam ne ka Reservation Policy, 1972 jong ka jylla, ka wanrah ïa kata ka jingphiah ïa ki trai ri-trai muluk ha ki lai bynta ha kaba ki la phiah ïa u Jaitbynriew Khasi bad Jaiñtia, kaba ar ki la phiah ïa u Garo bad kaba lai pat, ki la phiah sa ïa kiwei pat ki riewlum kiba shong ba sah hapoh ka jylla Meghalaya.
U Bah Roykupar u la ong ba ka seng ka la ai jingmut ïa ka Expert Committee ba ha shwa ba kan ktah ïa ka ‘Reservation Policy’ jong ka jylla kaba wanrah ïa ka jingphiah ïa ki Jaitbynriew, ka dei ban ap ïa ka rai jong ka Supreme Court namar kane ka bynta ka don hapdeng ka mukotduma kaba dang ïaid hapoh ka Supreme Court ba la wanrah da ka sorkar Punjab bad haduh mynta kam pat shym la don satia kano-kano ka rai kaba la pynmih halor kane ka jingphiah.
U la ong ba lada ka Supreme Court ka ai jingmynjur ba ka sorkar ka lah ban pynphiah bad pynïapher ïa ki Jaitbynriew, ka jingdawa jong ka seng ka long ba ka dei ban wanrah 50% ka bhah thungkam-thunjam na ka bynta ki Khasi bad Jaiñtia, 40% na ka bynta ki Garo, 3% na ka bynta kiwei-kiwei ki Jaitbynriew riewlum, 2% ïa ki Scheduled Caste bad 5% na ka bynta ki Unreserved Category.
“Katkum ka jingkheiñ jong ngi, lada 50% ngi ong ban ai ïa u Khasi bad Jaiñtia, 40% ïa u Garo bad 3% ïa kiwei ki Jaitbynriew, ka jingdawa jong ngi ka long ba ka bhah lada kyllum lang baroh jong ki Jaitbynriew kiba don hapoh kane ka jylla jong ngi, ka dei ban long 93%”, la ong u Bah Roykupar.
U Bah Roykupar u la ong ba ka bhah kaba mynta na ka bynta kiwei-kiwei ki jaitbynriew riewlum kaba long 5%, la kynthup lang ïa u Scheduled Caste bad kiwei-kiwei ki Jaitbynriew riewlum ka long kaei-kaei kaba ym ïahap.
“Ki lah dei ban phiah noh ïa ki ha ki ar-bynta; kaba mut 3% kan dei na ka bynta kiwei-kiwei jaitbynriew riewlum jong ka jylla jong ngi bad 2% kan dei na ka bynta ki Scheduled Caste”, la ong u Bah Roykupar.
U la ong ba ka seng ka la pynpaw ruh ba ka bhah ka dei ban treikam ruh ha ki kam kiba dei ki ‘Contractual’ lane ‘Casual’. Ka seng ka la ai jingmut ba ha ka bhah thungkam-thungjam ka dei ban don ka jingpynshai kaba bniah bha ha ka kyntien “Scientific Post” bad “Scientific Service”.
U la ong ba baroh shikatta ka bhah thungkam-thungjam hapoh ka jylla ka la shu khleh jaktung shaba palat la ka long ha ka jingleit thep kam ne jingleit pule la pynïaid bad pyntreikam beit da katei ka bhah.
