Shillong, Jylliew 16
Ka jingthmu ban pynbeit ïa u pud u sam ha ki shnong Khasi kiba sah hapdeng ki ar tylli ki district ha Manipur la hap ban pynsangeh shwa shipor hadien ba pynjari curfew ha Jiribam district namar ba mih ka huri-hura hapdeng ki Meitei, Hmar bad Kuki.
Haba ïakren bad u samla Donald Thabah uba dei u General Secret-ary ka KSU Sengkmie, u la ïathuh ba ka jingthmu ban pynbeit pud ha ki shnong Khasi ha khappud jong ar tylli ki district kata ka Jiribam District bad Tamenglong district ka la sahteng noh hadien ka jingpynjari curfew ha Jiribam district.
U la ïathuh ba kane ka huri-hura ha Manipur ka la sdang biang mar shu kut ka jingñiew ‘vote’ ha baroh kawei ka ri India ha kaba ka mih ka jingïakynad hapdeng ki Meitei, Hmar bad Kuki.
Nalor nangta u la ïathuh ba kane ka jingthmu ban pynbeit pud ha ki shnong Khasi ka dei hadien ba ka seng ka la phah jingthoh sha ka Lat ka jylla bad sha u Myntri Rangbah ka jylla Mani-pur ka dei namar ki Khasi kiba sah ha Manipur ki ju shah pyndik ha kiwei pat ki jaidbynriew kum ki Bengali.
U la ïathuh ba ki Khasi ki don ha lai tylli ki shnong kiba im ha ka rep tympew bad kwai bad kiwei de ki mar rep.
Shuh shuh u la pyntip ba ki ar tylli ki DC kin sa sdang ban jurip ïa ki shnong ki thaw hadien ba la dep ñiew ‘vote’ jong ka ilekshon MP Lok Sabha kata hadien ka 4 tarik Jylliew 2024 hynrei kane ka la sahkut noh namar ka la mih ka huri-hura biang.
“Wat la ka mih biang ka huri-hura sa ha Jiribam District kaba don marjan bad ki shnong Khasi hynrei ngi sngewkmen ban pyntip ba ki Khasi bad ki Naga kim shah pyndik namar baroh kitei ki jaidbynriew ki ai jingïada” u la ong.
U la pyntip ruh ba ki dkhot ka KSU Manipur bad wat ki bor district ka Jiribam ki kwah ba ki nongïalam ka KSU Sengkmie kin donlang ha ka sngi ba wan jurip ïa u pud u sam hynrei kin sa ïoh ban leit lang ynda la kut ka jingpynjari curfew.
