Shillong, Jylliew:
Ka Hynñiewtrep Youths’ Council (HYC) Mawthawpdah ha ka 13 tarik u Jylliew 2024, ka la leit ban ïakynduh ïa ka Myntri ka tnad ka koit ka khiah jong ka sorkar jylla, ka Dr. Mazel Ampareen Lyngdoh ban pynsngew ha kaba ïadei bad ka jingduna ki nongtrei hapoh ka PHC kaba don ha Mawthawpdah.
Ha ka jingïakren bad ki lad pathai khubor, u President ka HYC Mawthawpdah, u Bah Boniface Shangpliang, u la ong, kaba nyngkong eh ka jingeh ba ka seng ka la pynpaw sha ka Myntri ka dei halor ka jingduna ki doktor hapoh katei ka jaka ai jingsumar, namar haduh mynta katei ka PHC ka don tang iwei i doktor MBBS bad iwei pat i doktor Ayush bad ka seng ka la pynpaw ruh halor ka jingduna ki nos nalor kiwei-kiwei ki jingdonkam.
Ka seng ka ïoh ruh ban ïakren halor ka jingdon jong ka Sub-centre hynrei kim pat don pat ïa ka bording ilektrik, ka um, ka jingbym don ka lynti ban ïaid bad ki jaka sah jong ki nos bad kaba khadduh ba ka seng ka la ïoh ban ïakren bad pynpaw ha ka Myntri ka long halor ka jingduna bad ka jingdonkam ban pynbiang noh ïa ki jingthiah kiba don bad ki tyndong lyer ring mynsiem.
Kum ban shu kdew hangne, kane ka PHC ka kdup ïa kumba 30,494 ngut ki nongshong shnong. Ki shnong kiba kynthup ha kane ka PHC ki long haduh 74 tylli bad ki Sub-centre ki don 6 tylli.
Ka seng ka la ïathuh ruh ba na ka liang ka Myntri ka la ong ba kan sa leit ban hiar bad jurip hi dalade ha ka 18 tarik u bnai Jylliew 2024, ban ïohi ïa ki jingduna ha katei ka PHC ha ryngkat bad ki dkhot jong ka seng.
“Hadien ba ngi la ïakynduh ïa ka Dr. Ampareen, ngi sngewtynnad ba ka la ai ka jubab kaba sngewtynnad bha ha kaba ka la ong ba khnang ban shai, kan sa wan ban jurip hi bad ka la buh ïa ka por ba kan sa wan ha kine ki sngi”, la ong u Bah Shangpliang.
