Shillong, Jylliew 16
Ka dei ka jingïaid lynti kaba la jlan bha, kata naduh u snem 1948 bad ka la shim por 76 snem ïa ka RCLP School, Mawblang ha Mawkynrew konstitwensi ba kan ïoh ban shakri ïa ki khynnah ha ka ïingskul kaba la pynbit pynbiang bha naduh mynta u snem.
Ka burom bad jingsngewnguh kaba ki bor pynïaid skul, ki ‘riew rangbah na ka shnong bad kumjuh na ka Balang nalor ki kmie ki kpa lem ki khynnah skul ki ai na ka bynta kane ka jingïoh ïa ka ïingskul ka dei ïa u MLA ka thaiñ, Bah Banteidor Lyngdoh uba la pynïoh ïa ka mang tyngka haduh T.16 lak lyngba ka Chief Minister’s Special Development Fund (CMSDF) 2023-2024.
Kumta kum ka jingplie ïa kane ka ïingskul, la pynlong ïa ka jingïalang ha ka 14 tarik u Jylliew, 2024 ha kaba u Bah Banteidor uba la shah khot kum u kongsan u la plie pyrda ïa u maw sah kynmaw ha ka jingdonlang u Fr. Suresh, Parish Priest, Jongksha uba la kyrkhu ïa kane ka ïingskul.
Ha kane ka sngi la ïadonlang ruh u Bah Seiborlang Pyngrope, Sordar, u Bah Sylvester Pyngrope, Rangbah Balang, Bah Elias Suting, u Bah Nored Suting, Kong A. Songthiang bad u Bah Mattheus Songthiang kiba dei ki ‘Head Teacher’ ha ki kyrdan Lower Primary bad Upper Primary, ki nonghikai lem ki khynnah skul nalor ki kmie ki kpa.
Na kane ka mang tyngka la shna ïa ka ïingskul kaba ar mala kaba la kylla long ka jingurlong ka jingangnud kaba la da ki phew phew snem bad ki ‘riewrangbah kiba la ai jingkren ki la ong ba dei hi ka jingtrei shitom u MLA kaba la pynurlong ïa kane jingtei ïingskul.
Haba kren ha ka jingïalang, u Bah Banteidor u la ong, “Kham bun ka pisa na ka skhim MLA ka dei kaba nga mang sha ki jaka pule bad kumba nga ngeit ba ka jingnang jingstad ka dei ka atiar ban weng ïa ka jingduk jingkyrduh, nga buh ka thong ban pynbiang ïa ki jaka pule kiba bit ba biang ba kan long ka jingai mynsiem bad ka jingpynshlur ïa ki khynnah skul bad ki kmie ki kpa.”
“Bunsien ki don ki jingsngew ba ki khynnah skul na nongkyndong kim kot bor bad kiba na sor hynrei ngam ïahap ïa kane namar nga ngeit ba ka jingïatreilang ban pynbiang ïa ki jaka pule kan kyntiew ïa ka thaiñ la ha ka long ha ka rukom im, ka ïoh ka kot bad bun kiwei ki liang,” u la ong.
Da kaba pynpaw ba ka pule puthi ka la kiew ha ka thaiñ haba nujor bad ki snem ba mynshwa, u MLA u la ong ba ki khynnah pule na ka thaiñ ki la kiew ruh ha ka kam ïalehkai bad bun ngut na ka thaiñ ki la mih khmat sha ki lympung ïalehkai bapher-bapher ym tang ha ka Jylla hynrei shabar ruh kumjuh.
U MLA u la kyntu ba ka jingnang jingstad kan hap ïaid lang ryngkat ka burom ka akor.
“Ha kane ka pyrthei kaba bun ruh ki jingpynshoi bad ki jingpynngop ba har rukom, hap ban long kiba skhem bad shlur jingmut ban ong em ïa kino-kino kiba lah ban ktah ïa ka koit ka khiah ne ïa ka jinglong-jingman kum ki samla,” u la ong.
Ha kane ka sngi kum ka jinglehkmen, ki khynnah skul ki la ai ki jingrwai ban ai burom ïa u MLA uba la pynïoh ïingskul hadien 76 snem nalor kiwei pat ki prokram.
Ha kawei pat ka khubor, u MLA ha ka 15 tarik u Jylliew, 2024 u la leit ruh ban ïadonlang ha ka jinglehkmen halor ka jingleh bha ki khynnah ka Laitkyrhong Secondary School ha ka eksam Secondary School Leaving Certificate (SSLC) jong ka Meghalaya Board of School Education (MBOSE) ha kaba kane ka skul ka la pynlong ïa ka prokram pynkup burom ïa ki khynnah kiba la ‘pass’ bha mynta u snem nalor kiwei pat kiba la ‘pass’ ha u snem ba la dep.
Haba ai jingkren kum u kongsan, u MLA u la ai khublei ïa ka bor shnong kaba pyntyllun ïa kane ka skul da ka bor jong ka hi bad kumta u la ong ba un ïakren ba ka skul kan ïoh ka jingithuh na ka Sorkar khnang ba kan ïoh ki lad jingïarap. U MLA ha kane ka sngi u la aiti ruh ïa ka kor ‘Computer’ khnang ba ka skul ban ïoh ban pyndonkam.
