Shillong, Jylliew 16
U nongaiktien ka Voice of the People Party (VPP), Dr Batskhem Myrboh, u la ong ba u MP ka VPP u Dr. Ricky AJ Syngkon un shong ha ka liang pyrshah ha Parliament jong ka ri India hynrei un nym ïadon bynta bad ka INDIA Bloc pynban un kyrshan tang lada shah ktah ïa ka jaidbynriew.
U la ong kumba ka seng ka ïeng halor ka nongrim ban pyrshah ïa ka bamsap bad wanrah ïa ka synshar-khadar kaba khuid ba suba kam kwah ban donlang ha ka kynhun INDIA Bloc ba la ïalam da ka seng Cong-ress namar ha kane ka kynhun ki don bun ki seng kiba don dak sniew ha ka saiñpyrthei.
U la ong ba ka VPP kan nym ïatreilang bad ka NDA ba la ïalam da ka seng BJP hynrei kan shong ha ka liang pyrshah ban kren ïa ka jingeh jong ka jaidbynriew.
Shuh shuh u la pyntip ba ka seng kan pynkhreh ruh sa ïa ka ilekshon MDC hadien ba ki paidbah ki la dep jied ïa u MP na ka seng VPP.
U la ong ba ka seng kan sa buddien lada ka sorkar ka dang bteng ban pynjlan ïa ka ilekshon MDC namar kane ka long kumba ki thmu ban pynduh noh ïa ka synshar paidbah kaba u dei ban jied shisien ha ka san snem, hynrei kine ki MDC ba mynta ki ïoh ban shong tam ban shim tam ïa ka tulop hadien ba la kut ka samoi treikam san snem.
