Nongpoh, Jylliew 16
Kumba hynriew ngut ki briew ki la mynsaw ha ka jingtyngkhuh kali ha ka surok Shillong-Bypass ha Khapmara hynne ka step phyrngab.
Kane ka jingtyngkhuh kali ka dei hapdeng ka kali Maruti Alto bad kawei ka trok kit mar.
Kumba la ïoh lum jingtip na ki bor pulit, la ïathuh ba kane ka jingjia, ka dei kaba la jia ha ka por kumba 5:30 baje mynstep ha kaba katei ka kali Maruti Alto kaba don ïa u nombor AS 01AY 5489 ka la shah tynrah ha ka trok kaba don ïa u nombor NL 01AE 5956 kat haduh ba ki bynta ba shakhmat jong katei ka kali Maruti Alto ka la pra hi phom.
Na ka liang u nongñiah jong katei ka trok u la phet krad ïalade hadien katei ka jingjia.
Ha kane ka jingjia, u nongñiah jong ka kali ba la tip kyrteng kum u Rodina Janong (26 snem ka rta) na Qualapaty, Shillong lem bad san ngut kiba shong lang kiba kynthup ïa u Bah Jermi O. Shullai na Wahthapbru, Shillong, u Bah Tremiki Suting (26 snem ka rta) bad u Bah Eric Mawlieh kiba na Qualapaty, Shillong, u Bah Edmund Honghulu (28 snem ka rta) na Lumdiengjri, Shillong bad u Bah Francis Pde (28 snem ka rta) na ka shnong Lama Villa, ki la mynsaw bad pynkit noh sha Bhoirymbong CHC.
