Khliehriat, Jylliew 16
Ka Joint Action Committee (JAC) ba kynthup ïa ka shnong Umkiang, Ratacherra, Dona Skur, Dona Umbluh, Pyrtakuna, Kuliang, Borsara, haduh Tongseng, ka la shim ïa ka rai ban pakhang ïa ka surokbah NH6 khlem buh por.
Ïa kane ka rai pakhang surokbah, ka JAC ka la shim ha ka jingïalang kaba la long ha ka 15 tarik, Jylliew ha Community Hall, Umkiang.
U Chairman ka JAC, Ma Lasting Pala u la pyntip ba ka sngi sdang jong ka pakhang surokbah kan long naduh ka 19 tarik Jylliew kata ha ka Sngi Balang naduh ka por 7:00 baje mynstep.
Ki kali kiba ka JAC ka shah ban ïaid ki long tang ïa ki kali kit nongpang, kali shipai bad kali jong ki nongthoh kot khubor.
Ka jingpakhang ïa kane ka surok NH-6, ka long naduh Malidor haduh Tongseng kaba hap hapoh ka Elaka Narpuh, East Jaiñtia Hills District.
Ka JAC ka la shim ruh ïa ka rai ba kane ka jingpakhang surok khlem buh por yn weng tad haduh ba ka Sorkar lyngba ka NHAI / NHIDCL kan shna pyndep ïa ka surok ban maramot ïa ki krem ki kroh ha shilynter ka surok NH-6 ha ki thaiñ Namchiang bad kumjuh ban shna ïa ki nala kiba paka.
Kumta ka JAC ka la kyntu ïa baroh ki paidbah nongshong shnong, nongleit nongwan ban ïasnoh kti lang ha kane ka jingpakhang surok halor ka jingleh kuman bad bym kheiñ snep ka Sorkar ïa ka dong ka thaiñ Namchiang ban pynbha ïa ka surok NH-6.
