Dispur, Jylliew 16
U Myntri Rangbah ka Assam, u Himanta Biswa Sarma, ha ka Sngi U Blei u la pynbna ba ma u lem bad u Chief Secretary ka jylla kin sdang ban siew hi na pla lajong ïa ka bai thang bording ha ïing naduh ka 1 tarik Naitung.
“Ngin pynkut noh ïa ka kolshor ‘VVIP’ (VVIP Culture) ha kaba ïa ka bai thang bording jong ki heh sorkar la siew na ka khajna ba lum na ki paidbah. Ma nga lem bad u Chief Secretary ngin pyni nuksa da kaba sdang ban siew hi noh ïa ka bai thang bording naduh ka 1 tarik Naitung,” la pynbna u Sarma ha ka rynsan ‘X’.
Nalorkata, u la ong ba naduh u bnai Naitung mynta u snem, baroh ki nongtrei sorkar kin hap ban siew hi ïa ka bai thang bording kaba ki pyndonkam ha ki ïing ki sem jong ki.
“Ngi ju lap ba ïa ka bai thang bording ha ki ïing sah jong ki Myntri bad kiwei pat ki heh sorkar la siew da ka sorkar mynta la da ki phew snem. Kane ka dei kaba la ïaid mynta la 75 snem, bad kam dei kaba thymmai,” u la ong.
Haba plie pat ïa ka Janata Bhawan Solar Project, kaba dei ka projek bording ba tan na ka Sngi kaba don 2.5-Megawatt, ha ka jingïalang kaba la long ha Secretariat Complex, u Sarma u la ong ba man la u bnai, ka sorkar ka siew kumba T. 30 lak sha ka Assam Power Distribution Company Limited na ka bynta ka jingthang bording. Hynrei u la ong ba ka jingpyndonkam da ka bording ba tan na ka Sngi, kan ïarap ïa ka sorkar ba kan pyndonkam ïa ka pisa na ka bynta ki nongshong shnong ki baduk bakyrduh.
Nalorkata, u la bthah ïa baroh ki shlem treikam jong ka sorkar ba kin sdang pyndonkam noh da ka bording ba tan na ka Sngi.
