Nongstoiñ, Jylliew 16
Hadien ba ka tnad kam pohïing ka Sorkar Jylla ha ka 14 tarik u Jylliew, 2024 ka la pynmih ïa ka jingpynbna ba ka la pynkynriah kam ïa ki ophisar ka tnad pulit ha ki bynta bapher bapher ka Jylla baroh kawei, ha kaba ka kyrteng jong u Bah Lakador Syiem, IPS Commandant ka 4th MLP Bn, Sohpian ruh ka la paw kum uwei na ki heh pulit kiba shah pynkynriah kam. Kumta ha ka Sngi Saitjaiñ ki nongïalam shnong ha ryngkat katto-katne ki paidbah nongshong shnong jong hynriew tylli ki shnong kiba don marjan bad ka 4th MLP Bn ,Sohpian ki la ïa mih paidbah ban pynpaw ïa ka jingsngew pyrshah.
Ha kane ka sngi kum ka dak ka jingpynpaw ïa ka jingpyrshah, ki nongïalam shnong bad ki nongshong shnong katei ka thaiñ ha ryngkat ki ‘placard’ ba la thoh ïa ki kyntien pynrem ïa ka Sorkar lyngba ka tnad kam pohïing ki la pynlong ruh ïa ka jingïalang ba lyngkot hakhmat ka khyrdop jong ka 4th MLP, Bn Sohpian.
Katkum ka jingpynbna, u Bah Lakador Syiem, IPS, Commandant ka 4th MLP Bn, Sohpian u la shah pynkynriah kam bad ha ka jaka jong u, yn wan shimti noh da u Rupam R. Marak, MPS katba u Bah Lakador Syiem un leit ban shimti noh kum u Principal, Police Training School, Umran.
Lah ban kdew hangne ba u Bah Lakador Syiem, IPS u la wan ban shimti kum u Commandant ka 4th MLP BN, Sohpian ha ka 16 tarik u Jymmang 2023 ha kaba mynta ka dang kynjoh kumba shi snem tam eiei.
Haba kren ha katei ka jingïalang ba lyngkot, u Sordar ka Shnong Nongsohpian, West Khasi Hills, u Bah Sirian Wahlang u la ong ba kum ki nongshong shnong ki don ka hok ban dawa bad u la ong ruh ba kane ka Sorkar kam dei kaba kyllut kaba matlah hynrei ban long kaba peitmat kaba lah ban ïarap lem na ka bynta ka jingkwah ka jingthrang bad ka jingangnud ki paidbah.
U la ong ruh ba bun kiei kiei ki daw ba ka jingtreikam hok jong u Bah Lakador Syiem ka la pynkyndit ïa kiba bun balang hadien ka jingmih ka jingpynbna ban shah pynkynriah kam noh ïa u.
U la ïathuh ruh ba mynshuwa ha por kiwei ki Commandant, ka la don ka jingsngewsih ba wat ïa ki masi kiba rung hapoh katei ka shlem treikam ka Battalion, la ai hukum ban pynïap ïa ki masi ruh. Hynrei hadien ka jingwan jong u Bah Lakador, ka la don ka jingker (fencing) ïa ka jaka jong ka Battalion ba ki jingri ki rung ha kane ka jaka bad kane ka dei kawei kaba pynsuk kaba pynjan jong ki paidbah bad kane ka 4th MLP, BN.
Kiwei kiwei ki kam kiba u leh ka long ka jinglah jong u ban lum ïa ki khun ki kti ki jong ki nongshong shnong ban pynlong kata ka sngi burom ïa ki khynnah. U Bah Sirian u la ong ruh ba ym tang katta, ka jingïadei jong ki paidbah bad ki pulit ka long kawei ka mad kaba kongsan bha, ha kaba ki ïohi hapoh ka Jylla ki paidbah ki don kata ka jingshun hapdeng ki pulit bad ki paidbah ha kaba ha kane ka dong bad ka thaiñ ruh ka long kumta, hynrei ha ka jingwan ka jong u Bah Lakador kata ka jingïadei jong ki paidbah bad ki pulit ka la long kaei-kaei ka jingmyntoi ha kaba ki paidbah ki sngewjan.
