![Shah ktah jur ka shnong Huroi ha khappud Bangladesh na ka jingshlei um huroi](https://unongsainhima.com/wp-content/uploads/2024/06/huroi.jpg)
Khliehriat, Jylliew 16
Ka shnong Huroi kaba don ha ki bynta khappud India-Bangladesh ha East Jaiñtia Hills District ka la shah ktah na ka jingshlei um na ka jingwan ther jur u slap ha kine ki khyndiat sngi.
U Waheh Shnong Huroi, u Bah Golden Marbaniang u la ong ba kane ka jingshlei um ka la jia ha ka 15 tarik Jylliew bad bun tylli ki ïing ki la shah tap ha ka um.
U la ïathuh ba ïa ki briew la pynkynriah sha ki jaka ba lait ka jingma na ka jingshlei um.
Une u nongïalam shnong u la ong ba ka jingshlei um ka jia na ka daw ka jingbym don ki jingïada ïa ki wah duid, bad u la kyntu ïa ka Sorkar bad nongmihkhmat ka thaiñ ban shna ïa ka kynroh ban ïada ïa ka jingshlei ha ki bynta ba sharum ka shnong.
U la pynkynmaw ruh ba la dep ai dorkhas sha ka Sorkar ha ka ban shimkhia ban shna kynroh ban ïada na ki um ki wah ha ki snem ba la dep.