Nongstoiñ, Jylliew 16
Ka FKJGP-Rimuliang Circle da ka jingsngewkhia sa shisien pat mynta ka sngi ka la leit ban aiti ïa ka dorkhas sha ka tnad MePDCL (D) Nongstoiñ Division, West Khasi Hills ba kan shimkhia mardor halor ki katto-katne ki mat kiba donkam na bynta ki shnong kiba don ha ka thaiñ Langih, kawei na ki thaiñ kaba don mynta hapdeng ka jingïakren ïa u pud u sam hapdeng ka Meghalaya bad Assam.
Kitei ki mat ïa kaba ka FKJGP ka la leit ban aiti ïa ka dorkhas sha ka tnad ki kynthup ban pyndep noh ban pynpoi bording sha ki shnong kiba dang sah na kiba la sdang trei ha ki snem bala dep.
Ka FKJGP ka la pynpaw ba kum ka seng ka la sakhi ïa ka jingpyntrei na ka tnad ba dei peit ban pynpoi bording ha ka shnong Langpih, Mawdiangsnam, Umpha, Umyiap, Umbyrsit bad kiwei ki shnong kiba haduh mynta ki post ilektrik ki la shu ïeng thylli ha kitei ki shnong khlem pat lah ban leh eiei kum ka jingpynpoi noh ïa ka bording.
Ka FKJGP ka la dawa ba dei ban pyndep noh bad lada dang dei ban pyntrei ïa ki bad lada ym don shuh ka skhim ha kitei ki shnong dei ban mang thymmai noh khnang ba kitei ki shnong kin ïoh lang ïa kajuh ka jingmyntoi ha kiba bun ki kam.
Ka FKJGP ka la pynpaw ruh halor ka jingthurmur ka bai bording ha thaiñ Ri-Muliang ha kaba na ka liang ka seng ka la ong ba ka la ïohsngew bad ïoh pdiang shibun ki jingud jingnam na ki paidbah ka dong ka thaiñ halor ka jingthurmur ka rukom kheiñ rukom diah ïa ka bai bording ha ka thaiñ Rimuliang hi baroh kawei.
“Ngi tikna ban ong ba ka jingkheiñ bai bording (bill) hapoh ka thaiñ Rimuliang kam don da ka rukom khein kaba katkum ka jinglah pyndonkam (meter reading) ki nongshong shnong hynrei la shu kheiñ kyllum, ha kaba don ki khep ba kiba duk ba suk kiba ju pyndonkam tang khyndiat eh ka bording hynrei ki shah oh dor ha ka ophis kham heh bun shah ban ïa kito kiba kham bit kham biang kiba pyndonkam bording ha kiba bun ki rukom jingpyndonkam jong ki,” la ong ka seng.
Ka seng ka ong ruh ba kaba kum kane ka rukom kheiñ ka pyni ïa ka jingleh shiliang bad ka wanrah jingeh ïa kiba duk ba suk kiba pyndonkam hok ïa ka bording tang ban ïoh jingshai ha ka por mynmiet.
Shuh shuh ka la pynsngew ban ker noh ïa ki ‘Transformer’ bym pat don jingker, ha kaba ka FKJGP ka la pynpaw ba ka seng ka la ïoh ïa ka jingtip kaba tikna ba ki don shibun ki ‘transformer’ ki bym pat ker kiba lah ban long ka jingma ïa ki paidbah nongshong shnong khamtam ki khynnah ki khyllung ha ki shnong ki thaw kumjuh ki jingri jingdup. Kumta ka FKJGP ka kyntu ïa ka tnad ba kan shimkhia noh mardor kumjuh ruh ban ker noh ïa kine ki ‘Transformer’ ha thaiñ Tynghor bad Ktiehthawiar.
