Tura, Jylliew 16
U nongïalam ka seng samla TMC na Ri-lum Garo, u Richard Marak ha ka Sngi U Blei u la kynnoh ba ka don ka jingbamsap kaba jur, ka jingbym biang bad ka jingshah liang kaba jia hapoh ka synshar-khadar ha ka Jylla, ha kawei ka liang da kaba buh jingkylli sa katno ki paidbah ki lah ban shah haba phai sha ka jingkyntait ïa ka jingkhuid bad ka jingbym shah liang.
Katkum ka jingbatai u Marak, ka tnad Develop-ment of North Eastern Region (DoNER) dang shen ka la mang `126.94 klur na bynta ban tei ïa ka IT Park ha Tura. Kane ka jingmang ka dei shi bynta jong ka saiñdur kaba ïar ban shim khia ïa ki mat kum ka jingbym biang ha ka liang ki lad pynïasoh, ki jingthylli ha ka ‘Social Sector’, bad ban kyntiew ïa ka roi ka kiew ha ki 8 tylli ki Jylla ka Thaiñ Shatei Lam Mihngi, u la kam.
“Hynrei, ïa ka projek IT Park ha Tura la ai sha kajuh ka kompeni (Badri Rai and Company) kaba don bynta ha ka jingkhyllem ka tnum pyllun jong ka ïingdorbar thawaiñ ka Jylla bad ka jingkhyllem ka kynroh jong ka PA Sangma Stadium. La kynnoh ba kane ka kompeni ka don bynta ruh ha ka jingjia halor ka kam pisa ba ïadei bad ki ‘convoy’ u Myntri Rangbah, Conrad Sangma, ha kaba ba la ïoh ban bat ïa ka kali BRC ha ryngkat ?1 klur ha Arunachal Pradesh shuwa jong ka ilekshon. Kane ka jingjia ka wanrah ka jingsngewkhia halor ki kam bamsap bad ki kam pisa be-aiñ, ha kawei ka liang kaba wanrah ïa ka jingkah dum ha ka liang ka jingkhuid bad jinglong hok jong ki nongïalam ka Jylla,” la ong u Marak.
U Marak u la pynpaw ba ka jingai biang ïa ki kontrak heh sha ka kompeni wat hapdeng kiba bun ki jingkylli pyrshah ïa ka, ka kdew ïa ka jingbym larkam ha ka jingshim rai.
Haba ai nuksa biang sa ïa kawei ka kam ba ïadei bad ka jingkynnoh bamsap, u Marak uba mihkhmat ïa ka seng u la pynrem ïa ka mat treikam ka Sorkar MDA ban kyllum lang ïa ki projek rit bad kam maramot sha ki song heh – da kaba kdat sharud ïa ki kontraktor napoh ka thaiñ.
“Kane ka rukom leh ym tang ba ka pynduh mynsiem ïa ki kam khaïi ka thaiñ hynrei ka pynpaw pyrthei ruh ïa ka jingkyntait ka Sorkar ban kyntiew ïa ki nongseng kam ka Jylla bad ka jingkiew ha ka ïoh ka kot. Hato la khmih lynti ïa ki kontraktor ka Jylla ba kin ïatynjuh ha kane ka rukom kaba shah liang? Ka don ka rukom leh ha kaba ïa ki kam kontrak la ai sha ki kontraktor ki bym dei ki trai-ri haba phai sha ki projek heh bapher-bapher. Kane ka sienjam ym tang ba ka pynduh mynsiem ïa ki kam khaïi ka Jylla, hynrei ka kdew ruh ïa ka jingshah liang ka ban ktah ïa ka bha ka miat ka ïoh ka kot jong ki nongshong shnong ka Meghalaya,” u la ong.
Ha kawei ka liang, u Marak u la dawa ïa ka jingtohkit kaba bniah bad laitluid da ka kynhun tohkit ka Sorkar Pdeng ban lap ïa ka jingshisha haba ïadei bad kine ki jingjia bad ki rukom shah-liang bad jingkynnoh bamsap, ban pyntikna ïa ka jingkitkhlieh na bynta kito kiba donkti ha kine ki jait kam, ban khmih bniah ïa ka kam haba ïadei bad ka jingai kontrak, ban pyntikna ïa ka jingkhuid bad jingbym shah liang, ban khmih bniah ïa baroh ki kam kontrak heh ba la ai ha kine ki snem ba la dep nalor kiwei, ban ai jingmut ïa ki jingwanrah jingkylla ban khang lad ïa ki kam bamsap hadien-habud kumjuh ban wanrah ka jingshaniah ha u paidbah haba phai sha ka synshar-khadar hapoh ka Jylla lyngba ka khuid ka suba bad ka jingbym shah liang.
