Tura, Jylliew 17
Ka South Garo Hills ka la mad ïa ka jinghap slap kaba jur ha kine ki khyndiat sngi ba la dep ha Ri-lum Garo lem bad kiwei-kiwei ki jaka ba marjan – kaba la ïalam sha ka jingsahkut jong ka surok hapdeng ka Nongalbibra bad Baghmara hajan Siju.
Katkum ka jingïathuh ki nongshong shnong, u slap u la bteng ban hap ha ka por mynmiet ha kaba shi bynta jong ka surok NH-62 ka la shah rong noh ha Siju, ha kawei ka liang kaba la buh jingma ïa ka leit ka wan. Kumjuh, kiba bun ki jaka ha sawdong ka Karukol ki la shah tap ha ka um ha ka por mynsngi namar ka jingkiew ha ka um ha Wah Simsang.
“Ngi khmih lynti ba ka nym slap shuh mynta janmiet bad mynmiet lym kumta ngin sa mad jingeh. Ka surok ka la sahkut lypa ha Siju namar ka jingshah rong noh bad ki maw kiba la don ha lynti. Kane ka dei kajuh ka jaka ha kaba ki maw-bah ki la hap 2 snem mynshuwa bad ka jingbym don ka nala ban ai lad ïa ka um ban tuid, ka pyni. Ngi shu khmih lynti ba ki jinglong-jingman kin ym jur,” la ong u nongshong shnong ka Siju, u Ralseng Marak.
U Marak u la ong ruh ba ka leit ka wan sha Baghmara ka la buh jingeh shi kat dei namar ka jingbtuid khyndew kaba la tap ïa ka lynti. La sakhi ïa kiba bun ki kali kiba btuid katba ki dang pyrshang ban ïaid lyngba ka lynti ha Siju.
Kane ka jaka mynta kam don bording.
Haduh ba thoh kane ka khubor, ym don jingtip halor ka jingjulor hapoh ka distrik ne ki jingïap ne jingmynsaw.
Ha West Garo Hills, 2 tylli ki ïing ki la julor ha Tura bad la pynkynriah noh ïa ki briew sha ka jaka ba shngaiñ.
“Ngi la long lypa kiba la khreh baroh shi sngi bad ka kynhun SDRF ka la leh bha ban pynduna bad khmih ïa ka jingjulor. Ka don ka twa khyndew ha surok AMPT, Hallidayganj hynrei la lah banpynkhuid noh hapoh 2 kynta jong ka jingjia. Baroh ki surok hapoh ka distrik ki kylluid,” la ong u Deputy Commissioner, u Jagdish Chelani.
Ym shym la don jingjulor ba heh ha East bad North Garo Hills wat la ki SDRF ki long kiba la khreh.
