Nongpoh, Jylliew 17
Uwei u rangbah ba la don kumba 40 snem ka rta na ka dong Downgate, Nongpoh, u la pynkut jubor ïa la ka jong ka jingim da kaba sdien phasi ha kawei ka ïing-jah kaba don ha Nongpoh. Ïa ka met jong utei u rangbah la lap nyngkong da ki briew shnong ha ka por kumba 10 baje eiei mynstep.
Utei u rangbah uba dei na ka dong Downgate, la tip kyrteng kum u Suku Mejar bad u dei uba la don kumba saw ngut ki khun, hynrei la ïathuh ba u khlem sah lang shuh bad la ki khun ki kti. La ïathuh ruh ba utei u rangbah u dei ba shu trei bylla katba shaba ïoh bad thiah ruh kat shaba lap ba shem.
Kumta na ka liang ki nongïalam shnong ki la pyntip noh ïa kane ka jingjia sha ki bahaïing hasem jong utei u rangbah bad kumjuh ïa ki pulit ka thanat Nongpoh. Hadien ka jingwan poi jong ki pulit, ïa u ksai um, uba utei u rangbah u la pyndonkam ban phasi ïalade, la law noh ha ka jingdon ryngkat jong ki bahaïing hasem bad ïa ka met ruh la pynkit noh sha Nongpoh Civil Hospital na ka bynta ban pyndep ïa ki jingdonkam katkum ka aiñ.
