Shillong, Jylliew 17
ka Hynñiewtrep Youths’ Council (HYC) sengkmie ha ka 17 tarik u Jylliew kaba dei ruh ka sien kaba khyndai ka la leit ban aiti sa ïa 6 ngut ki khynnah Khasi kiba la kyrni ha u drok sha kawei ka jaka ai jingsumar na ka bynta kito kiba la ngop ha u drok ne ka ‘Rehabilitation Centre’ kaba don hapoh ka jylla Assam ïa kaba la tip kum ka ‘Alive Again Foun-dation Rehabilitation Centre’.
Kane ka jingleit aiti ka seng ïa kine ki khynnah sha katei ka jaka ai jingsumar ka dei lyngba ka jingïakren sngewthuh jingmut lang bad ki bahaïing hasem jong kine ki khynnah bad kam shym la don kano-kano ka jingphah jubor lane ka jingpynbor ïa ki ban leit sha katei ka jaka ai jingsumar.
Kiba bun napdeng kitei ki khynnah ki dei kiba la ïoh bat da ka seng ha ka por ba la pynlong ïa ka jingkhynra ïa ki nongdih bad ki nongdie drok ha kylleng ki jaka jong ka nongbah Shillong kiba la don kumba 20 ngut katba 10 ngut napdeng kitei khynnah ki dei kiba la phone bad wan aiti hi da ki bahaïing sha ka seng ban phah sha ki jaka ai jingsumar.
Haba ai jingkren ha kane ka sngi, na ka liang u Bah Donboklang Kharlyngdoh, Vice-President ka seng, u la ïathuh ba ki la don kumba 30 ngut eiei ki khynnah kiba ka seng ka la ïoh ban phah sha ka jaka sumar sha Assam. U la ong ruh ba ka seng ym tang ba ka lah kem ne thang ïa ki drok kiba la ïoh kurup, hynrei ka don ruh ka jingkitkhlieh ban phah ïa kitei ki khynnah sha ki jaka sumar khnang ba kin lah ban wan phai biang sha ka jingim kaba thymmai.
“Na ka liang ka HYC ym dei tang ba ngi ïakhun ha ki surok ban thang noh ïa u drok hynrei ha lyndet jong kata, kumba lai ne saw sien ha ka shitaïew, ngi ïakynduh bad ki kmie ki kpa sha ophis”, la ong u Bah Donbok.
Utei u nongïalam jong ka seng u la pyntip ruh ba ka HYC nalor ba ka la phah ïa kitei ki khynnah kiba la kyrni ha u drok sha katei ka jaka ai jingsumar, ki la don ruh ki longïing-longsem ki bym kot bor ban siew ïa ka bailutksan, na ka liang jong ka HYC ka la shim ïa ka jingbah khlieh ban ïarap siew ïa ka bailutksan na ka bynta kine ki khynnah kiba la ngop ha u drok.
Shuh shuh u Bah Donboklang u la ong ba ki don khynnah kiba la wan aiti hi da ki bahaïing hasem ki dei na kiwei pat ki distrik kiba kynthup na West Khasi Hills District, Ri-Bhoi District bad South West Khasi Hills District.
U Bah Donboklang u la kyntu ruh ïa ki kmie ki kpa jong ki khynnah ba ha shwa ba kin phah ïa ki khun ki kti jong ki sha ki jaka ai jingsumar, ki dei ban da wad jingtip bad da jied bha ïa kiba kum kino ki ‘Rehabilitation Centre’ kiba long ban phah.
U la ïathuh ruh ba katei ka ‘Alive Again Foundation Rehabilitation Centre’ ka dei ka jaka ai jingsumar kaba bit kaba biang bha bad ka don ruh ïa ka jingai jinghikai ha ka kynja mynsiem.
Namar kata, u kyrmen skhem ruh ba baroh kitei 30 ngut ki khynnah kin ïoh noh ïa ka jingim kaba thymmai bad u la ong ba lada kitei ki khynnah kin wan phai biang sha ka jingim kaba bha, ka imlang-sahlang ruh kan kylla dur.
