Shillong, Jylliew 17
Ka jingduh jingkyrshan ka United Democratic Party (UDP) kum kawei na ki seng riewlum kaba la rim ha kane ka Jylla ha ka ilekshon Lok Sabha ha ki konstitwensi bapher bapher ka la paw shynna namar ha kiba bun tylli ki konstitwensi MLA kiba hap hapoh ka Shillong Parliamentary konstitwensi, ki paidbah kim kyrshan shuh lait noh tang ha ki 4 tylli ki konstitwensi kiba u kyrtong ka seng u dang ïoh palat lai hajar ‘vote’.
Ki 4 tylli ki konstitwensi kiba u kyrtong ka UDP u Bah Robertjune Kharjahrin u dang kham ïoh ‘vote’ ki long ka Mairang, Ranikor, Mawkyrwat bad Khliehriat.
Na ki 36 tylli ki MLA konstitwensi, ka UDP ka la hiar ha ka jingïoh ‘vote’ ha kane ka ilekshon MP, lait noh sa tang ha kitei ki 4 tylli ki konstitwensi kiba dang ïoh lai hajar ‘vote’ shaneng. Na Mairang konstitwensi, u kyrtong ka UDP u Bah Robertjune Kharjahrin u ïoh 8,124 vote kaba dei ka konstitwensi kaba mihkhmat da u Bah Metbah Lyngdoh, nangta na Ranikor konstitwensi u ïoh 6,523 ‘vote’ kaba mihkhmat da u Bah Pius Marweiñ, na Mawkyrwat kaba mihkhmat da u Bah Renikton Lyngdoh Tongkhar u ïoh 3,121 ‘vote’ bad na Khliehriat u ïoh 4,224 ‘vote’ kaba mihkhmat da u Bah Kyrmen Shylla uba dei ruh u Myntri Sorkar.
Ki don ki konstitwensi kiba ka UDP ka ïoh ‘vote’ sa tang lai tylli ki dak jingkheiñ wat na ki konstitwensi kiba heh. Kum ha Mawlai konstitwensi kaba heh tam ha Meghalaya, ka UDP ka ïoh sa tang 324 ‘vote’. Kiba bun ki konstitwensi ki dei kiba ki ‘vote’ jong ka UDP ki la pharia khamtam eh ba ka leit sha ka VPP namar u kyrtong ka VPP u la ïoh ‘vote’ bad tam kput ïa kiwei pat ki kyrtong.
U kyrtong ka UDP u Bah Robertjune Kharjahrin u la ïoh 44,563 ‘vote’ na ka ‘vote’ kaba la thep palat 10 lak tam.
Kane ka jingkylli ka mih mynta namar ba ki seng saiñ pyrthei kin sa pynkhreh ban ïakhun sa ka ilekshon MDC.
Hato ki paidbah kin isih ïa ka UDP kumjuh wat ha ka ilekshon MDC kumba ki la tynjuh ha ka ilekshon MP?
