Shillong, Jylliew 17
Hadien ba ka jingdon ki MLA ka Congress ha Ïingdorbar Thawaiñ ka Jylla ka la hiar sha ka 4 ngut, ka jingkylli ka la mih mynta la u Lamphang ka Ïingdorbar Thawaiñ un ai jingithuh noh ïa ka Trinamool Congress (TMC) ka seng liang pyrshah kaba lamkhmat ha Ïingdorbar Thawaiñ.
Kane ka jingkylli ka la mih ruh na ka TMC khamtam namar ba ka dei ka seng Liang Pyrshah kaba kham bun eh ki MLA ban ïa kiwei ki seng liang pyrshah.
Haba ïakren bad u MLA ka TMC na Nongthymmai u Bah Charles Pyngrope u la ong ba ka shong ha u Lamphang ka Ïingdorbar Thawaiñ ban ai rai ha kaba ïadei bad ka jingithuh ïa kano-kano ka seng kaba dei ban lamkhmat ha Ïingdorbar Thawaiñ khamtam ban ïoh bat ïa ka kyrdan nongïalam ka Liang Pyrshah (Leader of Opposition) bad ïa ka kyrdan opposition Chief Whip.
Haba kylli, la ka TMC kan kam bad phah jingthoh sha u Lamphang ka Ïingdorbar Thawaiñ ka Jylla, u Bah Charles u la ong ba kano-kano ka seng kaba dei ban lamkhmat kum ka Liang Pyrshah ka donkam ban don 6 ngut ki MLA.
“Hynrei haba u Lamphang u la ithuh ïa ka Congress kaba don san ngut ki MLA kum ka seng Liang Pyrshah kaba lamkhmat wat lada kam don 6 ngut ki MLA. Ka jingkylli ka long, hato ka TMC ruh kan ïoh ïa kane kyrdan namar ba ka TMC mynta ka la long ka seng Liang Pyrshah kaba kham bun paid da ka jingdon ki 5 ngut ki MLA,” la pynpaw u Bah Charles. U Lamphang (Speaker) ka Ïingdorbar Thawaiñ ha u snem ba la dep u la ithuh ïa ka Congress kum ka seng Liang Pyrshah kaba lamkhmat bad ka Congress ka la ïoh ruh ban bat ïa ka kyrdan Leader of Opposition bad opposition Chief Whip.
U MLA ka Congress na Mylliem u Bah Ronnie V Lyngdoh u dei u nongïalam ka Liang Pyrshah katba u Saleng A Sangma u shimti kum u opposition Chief Whip.
Hynrei u Saleng u la iehnoh kam kum u dkhot ka Ïingdorbar Thawaiñ na Gambegre konstitwensi hadien ba u la shahjied kum u MP ka Tura, bad ka kyrdan opposition Chief Whip ruh ka la sah thylli mynta.
Napdeng ki seng Liang Pyrshah, ka TMC ka don 5 ngut ki MLA, ka Congress ka don 4 ngut ki MLA bad ka VPP ka don 4 ngut ki MLA.
