Mawkyrwat, Jylliew 17
Ka jingther jong u ‘lapbah ba jur ha kine ki khyndiat sngi ha South West Khasi Hills District ka la wanrah shibun ki jing-jot bad jingjulor jong ki ïing ki sem, ki lynti syngkien, bad kumjuh ruh ki surok na ka twa khyndew ha kiba bun ki jaka.
Katkum ka jingtip ba la ïoh lum, la ïathuh ba ha ka shnong Mawbidong, ki don haduh san tylli ki ïing kiba la shah pynjulor, ha Manad lai tylli, ha Lummawbah kawei, ha Mawpud ar tylli, ha Sarin bad ha Mawkhlaidngap mar kawei, kaba la ktah ruh ïa kumba 70 ngut eiei ki paid nongshong shnong.
La ong ba kane ka jingshah pynjulor jong ki ïing ki sem ka dei na ka twa khyndew bad kumjuh na ka jingshah jynrat bad shah lied ha ka ‘erïong. Hynrei, ha kine ki jingjia ym shym la don satia kano-kano ka jingjia ba sngewsih.
Shuh shuh la ïathuh ruh ba ki ar tylli ki lynti ïaid kjat ba la shna na ka skhim MGNREGS ha ka shnong Sarin bad Mawpud ki la shah pynjot noh na ka jingther u ‘lapbah.
Ha kajuh ka por la ïathuh ruh ba ka surok Mawrap-Mawsain ka la dkut noh na ka twa khyndew ha kawei ka jaka harum ka shnong Jerlang kaba jngai kumba 17 Kilometer eiei na Mawkyrwat.
Katkum ka jingïathuh u Myntri Shnong Mawbidong, u Bah Tanlum K Kharai la ong ruh ba ka surok Photjaud-Manad naduh na Tynnai ter ter haduh ha Mawbidong, ka la dkut bad jot lut na ka twa khyndew bad kumjuh ka jingtih thliew jong ka um slap ha kiba bun ki jaka jong katei ka surok.
Kumta, ka jingshah pynjot jong kane ka surok ka la wanrah shibun ki jingeh ïa ki paidbah nongshong shnong jong ka thaiñ Manad, kiba don tang kane hi kawei ka surok kaba pynïasoh ïa ki shnong jong ki bad ka thaiñ Mawkyrwat.
