Shillong, Jylliew 17 (UNI)
Ka seng National People’s Party (NPP) ka lah ban pynïakhun da ka Dr Mehtab Chandee Agitok Sangma, ka kurim jong u Myntri Rangbah Conrad K Sangma, ha ka ilekshon shiteng samoi na Gambegre, West Garo Hills, la ïathuh ki tyllong khubor na ka NPP ha ka Lah Sngi U Blei.
Ka Gambegre kam don MLA shuh hadien ba u Saleng A Sangma u la hap ban hiar shuki noh na ka jingjop ha ka ilekshon MP na ka seng Congress na Tura Parlia-mentary Constituency. U Saleng u la ai ïa ka shithi iehnoh kam kum u MLA ka Gambegre ha ka 10 tarik Jylliew.
“Kumba ka long mynta, ka Dr Chandee ka wan hakhmat eh ban ïoh ïa ka tiket ban ïakhun ïa ka ilekshon shiteng samoi na Gambegre,” la ong uwei u nongkitkam ka seng NPP uba khlem kwah ban pynpaw kyrteng haba ïakren bad ka United News of India (UNI).
“Ki la don bun bah ki nongshong shnong na Gambegre kiba dang shen ki la wan ïakynduh ïa u Myntri Rangbah bad ki la kyrpad ïa u ban jied da ka Dr Chandee kum ka kyrtong ka seng NPP ha ka ilekshon shiteng samoi na Gambegre,” la bynrap utei u nongïalam.
Ka Dr Chandee ka dei ruh ka National Treasurer ka seng NPP.
Ha kawei pat ka liang, hadien ka jingjop donburom ha ka ilekshon MP dang shen, ka Congress ka dang peit bniah ïano ba kan pynïakhun, bad ki kyrteng kiba paw ki don jong u Jingjang Marak bad ka Deborah C Marak.
Lah ban kdew ba u Jingjang u dei u paralok uba ïajan bha bad u Saleng katba ka Deborah, kaba la long teng ka Symbud Myntri Rangbah ka jylla, ka dei ka Working President ka Meghalaya Pradesh Congress Committee bad ka don ka jingïadei kaba jan bad ka longïing longsem jong ki Gandhi. Nalorkata, ka Trinamool Congress ka lah ban pynïakhun da ka MDC ka GHADC, ka Sadhiarani M Sangma. Ka Sadhiarani ka la ïakhun la arsien ha ka ilekshon MLA na Gambegre ha u snem 2018 bad 2023, hynrei ka khlem jop. Kane ka longkmie ka dei ruh ka kurim jong u MLA barim, u Zenith M Sangma, uba la ïakhun ha ka ilekshon MP kaba dang shu dep shen.
Na ka liang ka BJP ka la pynpaw ba ka kwah ban pynïakhun da u MDC ka GHADC, u Bernard N Marak, ha katei ka ilekshon shiteng samoi na Gambegre.
“La dep ban ai jingmut da ka kyrteng jong nga, bad mynta ngi ap ïa ka rai jong ki nongïalam na Delhi. Ki nongtrei jong ka seng ki la sdang ban trei ïa ka kam ha Gambegre,” la ong u Bernard.
Lah ban kdew ba u Saleng u la mihkhmat ïa ka Gambegre ha ka Ïingdorbar Thawaiñ naduh u snem 2008, bad u khlem pat shah rem naduh ba u la sdang ban ïakhun ilekshon. Ha kawei pat ka liang, u Chief Electoral Officer (CEO) ka Meghalaya, u Dr BDR Tiwari, u la ïathuh ba la dep ban ai jingtip sha ka Election Commission jong ka Ri India (ECI) halor ka jingiehnoh kam MLA jong u Saleng bad na ka liang ka ECI kan sa ai ïa ka rai.
