New Delhi, Jylliew 17
U Myntri ka tnad Pohïing jong ka Sorkar Pdeng, u Amit Shah u la ong ba ka tnad kan sa ïakren bad ki ar kynhun ka Jylla Manipur ba kynthup ïa ki Meitei bad ki Kuki, khnang ban wanrah noh ïa ka suk ka saiñ hapdeng kine ki ar jaidbynriew jong kane ka Jylla.
U Shah u la ong ïa kane ha ka jingïalang ha New Delhi ha ka Lah Sngi U Blei ban peit ïa ka jinglong-jingman jong ka jingshngaiñ ha Manipur.
Haba ban jur halor ka jingkongsan jong ka jingïatreilang ban pynbeit ïa ka jingkulmar kaba dang don mynta, u Myntri u la ong ba ka tnad Pohïing ka Sorkar Pdeng kan sa ïakren bad baroh ar kynhun – ki Meitei bad ki Kuki, khnang ban wanrah ka jingïasuk kaba kham kloi hapdeng kitei ki ar jaidbynriew.
U la pyntikna ruh ba ka Sorkar India ka la kyrshan ïa ka Sorkar Manipur ban kyntiew ïa ka jingshngaiñ ha ka Jylla.
U Myntri uba la khmih pura ïa ka jinglong-jingman jong ka jingshngaiñ ha Manipur, u bthah ba dei ban peit ba yn ym don shuh kano-kano ka jingïaumsnam ha Manipur.
Haba ban jur halor ka jingphah ïa ki kynhun pahara jong ka Sorkar Pdeng ban wanrah biang ïa ka shongsuk shongsaiñ ha Manipur, u la ong ba yn pynbun shuh ïa ki dkhot kynhun pahara lada donkam.
U Myntri u la bthah ruh ban shim ïa ki sienjam ba khlaiñ katkum ka aiñ pyrshah ïa kito kiba ïaumsnam.
Nalor kane, u Shah u la ong ba ka Sorkar India hapoh ka jingïalam jong u Myntri Rangbahduh ka ri, u Narendra Modi ka ïeng skhem ha ka jingpyntikna ïa ka jingshngaiñ jong baroh ki briew ka Manipur.
Halor ka jinglong-jingman ha ki jaka rieh tngen, u la bthah ban pyntikna ïa ka jingbiang ki marbam, ka um, ki dawai lem bad kiwei-kiwei ki jingdonkam.
Shuh shuh u la bthah ïa u Chief Secretary ka Manipur ban pyntikna ïa ki lad ai jingsumar bad lad jingpule na ka bynta kito kiba la hap phet na ïing bad ruh ban pyntikna ba ki ïoh ka jaka sah ba biang.
Ha kane ka jingïalang la wan ïashim bynta lang da u Chief of Army Staff, General Manoj Pande, Secretary ka tnad Pohïing jong ka Sorkar Pdeng, Director, Intelligence Bureau (IB), Chief of Army Staff (Designate), Lt. General Upendra Dwivedi, Security Advisor sha ka Sorkar Manipur, Director General ka Assam Rifles, Chief Secretary, Director General of Police (DGP) ka Manipur bad ki ophisar jong ka kynhun shipai jong ka ri bad ka tnad kam pohïing.
