Shillong, Jylliew 17
Ka kynhun jong ki pulit na ka Anti Narcotic Task Force (ANTF) jong ka East Khasi Hills ha ka step jong ka Lah Sngi U Blei ki la ïoh ban kurup drok bad kem noh ïa ar ngut ki kynthei kiba dei nongkhaïi na ka thaiñ Madanrting.
Kine ki kynthei kiba la shah kem ki dei ba la tip kyrteng kum ka Tinkhonei Haokip kaba la 37 snem ka rta bad ka Mongkim Haokip kaba la 53 snem ka rta na ka jylla Manipur.
Ha ka kyrwoh khubor ba la pyllait da u Superintendent of Police ka East Khasi Hills u Bah Sylvester Nongtnger, u la pyntip ba kane ka jingïoh kurup drok bad kem ïa kitei ar ngut, ka la long ha ka por ba la pynlong ïa ka jingtalasi kali ha ka por mynstep jong ka 17 tarik Jylliew hajan ka thanat Madanrting.
U SP u la ong, ha kane ka jingtalasi kali, la ïoh ban kurup ïa u drok uba don ka jingkhia haduh 454.32 gram na ka kali tourist kaba kitei ar ngut ki la pyndonkam.
Ha kaba ïadei bad kane, ki pulit ki la pynngat noh ïa kitei ar ngut hapoh ki kyndon aiñ jong ka NDPS Act ha thanat Madanrting bad ka jingtohkit mynta ka dang ïaid shakhmat ban lap ksai shuh ïa kiwei pat kiba donkti.
