Shillong, Jylliew 17
Ka Bharatiya Janata Party (BJP) ka la kwah ban bat hi biang ïa ka shuki Speaker (Lamphang) jong ka ïingdorbar Lok Sabha hadien ba ka la jop haduh 240 ngut ki MP ha ka ilekshon kaba dang shu dep, la ong ka tyllong khubor ha ka Lah Sngi U Blei bad bynrap ba ka BJP ka lah ban tyrwa pat ïa ka shuki Deputy Speaker sha ki paralok ba ïatreilang hapoh ka kynhun synrop National Democratic Alliance (NDA).
Ha kaba ïadei bad kane ka kam, la aiti ha u Myntri ka tnat Ïada Ri ka Sorkar Kmie u Rajnath Singh uba dei ruh uwei na ki nongïalam ka BJP ban pynïaid shakhmat ïa ka jingïakren bad ki paralok ba ïatreilang hapoh ka kynhun synrop NDA ba kynthup ïa ka Janata Dal-United (JD-U) bad Telugu Desam Party (TDP).
Ka ïingdorbar Lok Sabha kan sa jied ïa u ne ka Lamphang bathymmai ha ka 26 tarik mynta u bnai bad ha kaba ïa shithi jingkyrshan ïa u ne ka kyrtong dei ban pynpoi shi sngi shwa jong katei ka sngi, kaba long katkum ka jingpyntip jong ka Lok Sabha Secretariat.
Ka tyllong khubor ka la ong ruh ba ka INDIA Bloc ka lah ban pynïeng kyrtong na ka bynta ka shuki Lamphang lada ym ai sha ki ïa ka shuki Deputy Speaker.
Shuh shuh ka tyllong khubor ka la ong ba ka JDU bad ka TDP ki la dawa ïa ka shuki Lamphang, ha kaba u nongïalam ba la rangbah ka BJP u la ong ba ïa kane ka kam yn ïakren nyngkong hapoh ka seng shwa ban ïakren pat bad ki paralok ba ïatreilang ban poi sha u kyrtong ïamonlang.
Katba na ka liang u Myntri Rangbah ka Andhra Pradesh u N Chandrababu Naidu uba dei u nongïalam ka TDP, u la ong ba ki paralok ba ïatreilang hapoh ka NDA ki dei ban rai noh ïa u kyrtong ïamonlang, katba u Myntri Rangbah ka Bihar bad nongïalam ka Janata Dal (United) u Nitish Kumar pat u la ong ba ka seng jong u kan kyrshan ïa ka rai jong ka BJP.
