Jowai, Jylliew:
Ka Jowai Civil Hospital Blood Centre kaba don ha Panaliar ha ka 14 tarik Jylliew ka la rakhe ïa ka ‘World Blood Donors Day’ halor ka phang “20 Years of Celebrating Giving: Thank You, Blood Donors” ha Conference Hall ka hospital.
U Additional Deputy Commissioner, Bah F.B. Basan, MCS, kum u kongsan u la kren halor ka jingdonkam ban ïoh ïa ka snam khnang ban lah ban ïarap ïa ki briew ha ka por kaba biang. U la ai khublei ïa ki nongsynñiang snam kiba la ïarap ïa kiba bun ki jingim briew.
Ka Dr. I. Khyriem, Senior Medical & Health officer, Jowai Civil Hospital Blood Centre ka pynpaw ka jingsngewnguh ïa ki nongsynñiang snam.
Ka la kren ruh halor ka jingdonkam ban wan synñiang snam tista khnang ba kan ym don ka jingduna snam na ka bynta ki nongpang kiba donkam snam. Ka la pynshlur ïa ki samla ban wan shakhmat ban synñiang snam.
U Naoo Saki Garod uwei na ki nongsynñiang snam tista la kumba 10 sien, u la ong ka jingdon ka jaka kynshew snam hapoh ka distrik ka ïarap shibun ïa ki paidbah ym kum mynshwa ki paidbah ki hap ba leit shaduh Shillong na ka bynta ban synñiang snam kumta u sngew ba ka long kaba donkam ban don snam shibun ka snam hapoh ka jaka kynshew snam khnang ban ïarap ïa kito kiba donkam kyrkieh.
Ha kane ka sngi la pynkup burom ïa ki ‘riew shimet kiba kynthup ïa u Ebed Adonai Andronicus Chullai, Solly Meekway Bareh, Williambor Sumer bad Naoo Saki Garod halor ka kam synñiang snam jong ki.
Nalorkata la ai burom ruh ïa ka seng Sarot-i man, ka Jingïaseng Samla Presbyterian Jowai, Occupational Health Centre Dalmia Cement Bharat Ltd, Kur Sookpoh khad Arwyrnai, Dorbar Shnong Chilliang Raij, Seng Samla Unitarian Church, Jowai, Woodland W.K. Hospital Sabahmuswang, HDFC Bank, Jowai, Department CSR Star Cement, Khynroo Khyllood Committee Seinraj Jowai, North-East Adventist University, Khliehtyrshi, Deimayatori, Green Valley Industries, Meghalaya Cricket Association WJHD, West Jaiñtia Adventure & Cycling Association, Jowai Civil Hospital, Blood Centre, Ae- Deimaya, Seng Samla Katholik Jowai, bad Indian Red Cross Society, West Jaiñtia Hills District.
