Shillong, Jylliew 17
Ar ngut ki nongshong shnong ka Meghalaya ki la lait im da ka said ha ka jingshah tynrah jong ka rel ‘Kanchanjunga Express’ ha Darjeeling distrik ha ka step Lah Sngi U Blei ha kaba 9 ngut ki briew ki la khlad.
Kane ka rel ka la shah tynrah nadien ha kawei pat ka rel kaba kit mar ha North Bengal.
Ka kotkhubor ‘Hindustan Times’ mynta ka sngi ka la pynmih ïa ka khubor ha ‘website’ jong ka ha kaba ka la ïakren bad ar ngut ki nong Meghalaya kiba la don ha katei ka rel.
Katkum kane ka khubor, la ong ba u Kisan Chettri, uba shong ba sah ha nongbah Shillong, u la don ha lynti ban leit sha Sealdah, West Bengal, na ka bynta ba wad kam wad jam.
Haba batai shaphang katei ka jingjia, u Kisan u la ong, “Ka dei ha ka por kumba 8:30 mynstep haba nga la ïohsngew ïa ka jingsawa kaba jam bad hadien kata ka rel ka la khih tyngeh. Ha kata ka por, nga dang ïalehkai ha Mobile Phone. Hynrei mar kumta, ka kamra (Coach) ba ngi shong ka la sdang ban kylla bad ka la mih ka huri-hura.”
“Shu donbok ba nga khlem mynsaw, hynrei ki pla bad ki tiar ki tar ba nga la rah ki la jah. Ki la don kumba 20 ngut kiwei pat kiba la shong lang bad ngi ha kata ka Coach. Wat la kiwei ki khlem lei-lei, ar ngut pat ki la jah rngai. Ngi la wad ïa ki, hynrei ngi khlem lap satia,” la bynrap u Kisan.
Hynne ka step, kawei ka rel kaba kit mar ka la tynrah ïa ka rel Kanchanjunga Express kaba dang don ha lynti ban leit sha Sealdah. Saw tylli ki kamra jong katei ka rel kit briew ki la julor.
Nalorkata, katei ka kotkhubor ka la ïakren bad u Johnson Chettri, uba dei na Meghalaya, bad u la ong, “Nga khlem tip briew shiphang. Dei tad haduh ba kiwei pat ki la tan ïa nga ba nga la kyndit bynriew bad nga sa sngewthuh kaei kaba la jia.”
“Ha ka por ba ka rel ka la shah tynrah, nga dang kren ha ka phone…Nga khlem tip shuh kaei kaba jia hadien kata. Hynrei ynda nga la kyndit bynriew, nga la ïakren bad ki kmie ki kpa bad nga la ïathuh ba nga la lait na ka jingma jingmynsaw,” la bynrap u Johnson.
