Shillong, Jylliew 17
U MP ka Voice of the People Party (VPP) na Shillong Parliamentary konstitwensi, u Dr. Ricky A.J. Syngkon u la ong ba un trei minot ïa ka kam kaba la bynshet ha u bad un rah ruh ïa ki mat ba ïadei bad ka Jylla hapoh ïingdorbar Parliament.
Haba kren shaphang ka Dorbar banyngkong jong ka Lok Sabha kaba 18 ka ban sdang ha ka 24 tarik Jylliew haduh ka 3 tarik Naitung, u Dr. Syngkon u la ong ba ha kane ka Dorbar, yn sakhi ïa ka jingbam smai jong ki MP kiba la shah jied thymmai, ka jingjied ïa u Lamphang, ka jingkren na ka President ka ri nalor kiwei-kiwei.
Haba ïadei bad ka jingkren ka President, u la ong ba ka President ka lah ban kren halor ka saiñdur jong kane ka Sorkar bathymmai – kaei kaba ka Sorkar kan leh ha kine ki san snem ban wan.
“Kutkum ki mat jingkular ka seng – ka Khyrnit ba 8, ka Inner Line Permit (ILP), u pud u sam, ka jingeh ki samla ha ka kam ka jam, ki shlem treikam ka Sorkar Pdeng kiba kum ka Jylla ngi khmih lynti ba kin long ka jingkyrkhu, hynrei kim shym la bud ïa kaba ki dei ban leh khamtam ha ka ïoh kam ïoh jam…kine ki long ki katto-katne na ki mat kiba ngin pynsngew hapoh ïingdorbar,” la ong u Dr. Syngkon ha ka Lah Sngi U Blei. U la ong ruh ba kum ka seng nalor ka jingpynsngew ïa ki mat bapher-bapher, ha kajuh ka por kan phah ruh ïa ki jingthoh ban buddien bad kan pyrshang katba lah ban leh ïa kaba bha tam da kaba buh jingmut ïa ki 24 tylli ki mat jingkular jong ka seng.
Haba ban biang halor ka jingbuddien ïa ki mat ba sahteng bad ka Sorkar Pdeng, u la ong, “Wat la kam long kaba suk hynrei ngin trei shitom. Kum ka seng kaei ba ngin leh kumba ngi leh ha Jylla, ngin kren bad thoh ruh halor ki mat ba ïadei bad u paidbah.”
Na ka liang u MP, u la ong ruh ba un leit sha nongbah Delhi ha ka 22 tarik mynta u bnai.
