Nongstoiñ, Jylliew 17
Ka jingther jong u slap ba jur ha kine ki sngi ka la wanrah ïa ka jingdkoh ha ka leit ka wan ha ka shnong Nongumkap namar ka jingkieng dieng ha ka wah Ryndi kaba pynïasoh ïa katei ka shnong bad kiwei ki shnong ka la shah rong noh ha ka um.
Kane ka jingshah rong um noh jong katei ka jingkieng dieng kaba la jia ha ka 16 tarik mynta u bnai, ka la buh ruh ha ka jingma ïa ki paidbah nongshong shnong ka Nongumkap bad ki shnong marjan.
Nalor nangta, la ong ba ïa kane la lap ruh ha ka step jong ka 17 tarik mynta u bnai lyngba ka jingleit peit jong ka Executive Committee ka shnong Nongumkap ryngkat ki paidbah nongshong shnong. Lah ban kdew hangne ba ka shong Nongumkap kaba la don naduh u snem 1952 ka dei kawei na ki shnong kaba don ha syndah ka wah Ryndi kaba pynïakhlad ïa ka West Khasi Hills bad ka East Garo Hills.
Shuh shuh la ong ba kane ka shnong ka dei kaba don ha tduh ne kaba khatduh eh jong ka district West Khasi Hills. Kane ka shnong ka dei ruh kaba mad ïa bun ki jingeh jingjynjar namar ka don ha khappud bad ka rilum Garo ha ka por ba dang bun bad dang khlaiñ bha ki seng kieng atiar ha ri-lum Garo ha ki por ba kham mynshuwa.
La ong ruh ba ha kine ki sngi bad por ba mynta, kane ka shnong ka la kham shong suk hynrei ka jynjar pat ha ka ïaid ka ïeng namar kam pat don surok kaba bha lait noh tang ka surok khyndew ne MGNREGS kaba jynjar sat marsien wan ka lyiur ka la shong ktieh bad buh jingeh ïa ki kali ba kin ïaid lyngba.
Na ka liang ki nongshong shnong ki la pynkynmaw ruh ba ha ka 30/03/24 ki paidbah ka shnong Nongumkap hapoh ka jingïalam u Sordar shnong u Bah Jeremia Dkhar bad General Secretary u Bah Samson K Bani ha ryngkat ki paid nongshong shnong ki la ïa mih paidbah ban shna ïa ka jingkieng kaba pynïasnoh ïa ka West Khasi Hills bad ka East Garo Hills ban pynsuk ha ka ïaid ka ïeng ka leit ïew leit hat. Kumta da ka jingdkut noh jong katei ka jingkieng dieng ka la pynlong ïa ki paid nongshong shnong ka Nongumkap bad ki shnong kiba marjan ban ym lait ïaid ne jam shuh.
Kumta, ka EC jong ka shnong bad ki paid nongshong shnong ka Nongumkap ki la phah ka jingkyrpad sha u MLA bad MDC ka thaiñ bad kumjuh sha ka sorkar ban phai khmat lem sha kane ka dong ka shnong ban pynïoh ïa ka jingkieng wah-Ryndi bad ban pynpoi ïa ka surok sha kane ka shnong ban suk ka leit ka wan ki paid nongshong shnong ha kane ka dong ka thaiñ.
