Shillong, Jylliew 17
Hadien ar taïew eiei naduh ba la pynbna ïa ka risol jong ka ilekshon Lok Sabha, u nongïalam ka Congress u Rahul Gandhi ha ka Lah Sngi U Blei u la pynbna ba un ïai neh kum u MP ka Raebareli ha Uttar Pradesh bad pyllait noh ïa ka shuki MP na Wayanad na ka bynta ban ailad ïa ka para jong u ka Priyanka Gandhi Vadra ban ïakhun ha ka sien ba nyngkong eh na kane ka constituency ha Kerala.
Lah ban pynkynmaw ba u Rahul Gandhi u la jop na baroh ar tylli ki constituency kiba u la ïakhun kata na Raebareli bad Wayanad. Ka Priyanka ruh ka la trei shitom bha ha ka ban ïalap ilekshon Lok Sabha ha Raebareli bad Amethi.
Haba ai khublei ïa ki paidbah jong ka Wayanad na ka bynta ka jingieit bad jingkyrshan ka jong ki, u Rahul u la ong ba ka Priyanka Gandhi kan sa ïakhun ïa ka ilekshon na kane ka constituency bad na ka liang jong u, ruh un nym ieh kumto hynrei un hiar ban leit jngoh man la ka por.
“Nga la don ka jingïadei kaba la rim bha bad ka Raebareli. Nga dap da ka jingkmen ba ngan ïoh lad biang ban mihkhmat ïa ki hynrei kane ka dei ruh ka rai kaba eh bha,” u la ong.
Ha kawei pat ka liang, ka Priyanka Gandhi Vadra ka ban sa mih ban ïakhun ïa ka ilekshon ha ka sien ba nyngkong eh na Wayanad ka la ai ka jingkular sha ki paidbah ka constituency ba kan pyrshang kat lah kat ïai ban long ka nongmihkhmat kaba biang bad ruh ban pynthikna ba ki paidbah kin nym sngew kynjah satia ïa u Rahul Gandhi.
“Nga dap da ka jingkmen ban ïoh mihkhmat ïa ka Wayanad bad ngan nym pynlong satia ïa ki paidbah ba kin sngew kynjah ïa u Rahul. Ngan trei shitom bad ngan pyrshang ban pynkmen ïa baroh bad ban long ka nongmihkhmat kaba bha,” ka la ong.
Katba na ka liang u nongïalam ka BJP u K Surendran, uba la ïakhun pyrshah ïa u Rahul Gandhi ha Wayanad, u la kynthoh tyngeh halor kane ka rai jong utei u nongïalam ka Congress ban ieh noh ïa ka constituency ha Kerala bad ong ruh ba ka jingïathuh lypa jong ka BJP ka la urlong shisha.
U Surendran u la ong, ka jingïathuh lypa jong ka BJP ka la wan urlong shisha, ha kaba une u MP uba ju jah beit ha kaba khatduh u la rai ban pyllait noh ïa ka Wayanad, da kaba shet kylla ïa ka jingshaniah jong ki paidbah.
