Shillong, Jylliew 18
Ka jingthmu ban plie ïa ka ïing skul bathymmai kaba la dep ban tei naduh mynshem snem ka la pulom noh hadien ka jingbym wan poi satia jong u MLA wat hadien na ka liang ki nongïalam shnong ki la pynkhreh pynkhrum bha.
Ha kaba ïadei bad kane, u Rangbah Shnong ka Nongrim Jirang Bah K Rani u la ïathuh, ba ki dkhot ka komiti jong ka shnong bad ka Managing Committee ki la pynbeit ïa ka sngi ban plie ïa katei ka ïing skul thymmai, hynrei ka la pulom noh namar ba u MLA ka thaiñ u Bah S Sohtun u khlem wan satia ha katei ka sngi.
U la ong ba ki dkhot ka komiti ka shnong ryngkat bad ka managing committee ki la dep ban pynbeit ban plie noh ïa katei ka ïing skul ha ka 16 tarik mynshem bnai, hynrei ka jingbym wan u MLA ka la pynpulom noh. U la ong, kane ka jingleh u nongmihkhmat ka pynpaw ba um burom ïa ka shnong bad ka jingduhnong namar ka shnong ka la pynkhreh ïa ki jingdonkam ha katei ka sngi.
La ïathuh ba ïa kane ka ïing skul thymmai kaba don haduh hynriew kamra bad kaba la tap da ka tin, la tei ha ka jinglut kaba long 28 lak tyngka, ha kaba la mih ka jingpynpaw ba kam ïahap satia ka jingmang pisa bad ka jingtei ïa ka ïing skul.
Ha kaba ïadei bad kane, ka Confederation of Ri Bhoi People (CoRP) ka la dawa na ka sorkar jylla lyngba ka tnat pule ba ka dei ban plie noh ïa ka ïing skul thymmai jong ka Nongrim Jirang Lower Primary School kaba la dep shna naduh mynshem snem hynrei haduh mynta ym pat lah ban plie ïa katei ka ïing skul thymmai.
Ka CoRP ka la pynpaw ka jingsngewkhia ïa ka jingpynslem jong ka sorkar ban plie ïa ka katei ka ïing skul ba shna kyrpang na bynta ka jingbit jingbiang ki khynnah skul, ha ka jingshisha ka la dei ban plie noh ïa katei ka ïing skul shwa ban long skul mynta u snem, kaba lyngngoh haduh mynta ym pat lah ban plie ha kaba ki khynnah skul bad ki nonghikai ki hap ban kynduh jingeh namar ki hap ban pynlong skul ha ka ïing skul barim kaba la jot bad ki khynnah ki shem shitom ha ka por slap.
Kumta na ka liang ka CoRP, ka dawa na ka sorkar ba ka dei ban plie noh ïa katei ka ïing skul thymmai na bynta ka jingmyntoi ki khynnah skul, namar lada kan shu ieh katei ka ïing skul kan jot bad pra bad kylla ïing jah. Kane ka long katkum ka kyrwoh khubor ba la phah da Bah Gershome Hat, Vice President ka CoRP.
