Shillong, Jylliew 18
Ka Federation Of Riwar Mihngi Local Dorbar (FORMLD) na ka thaiñ Pynursla ka la pynpaw ïa ka jingsngewsih bad ka jingbym sngewïahap halor ka jingkren jong uwei u rangbah na ka shnong Umden Nong-poh, Ribhoi District hadien ba u la ai jingkren ha kawei ka rynsan pathai khubor shimet ha ka por ba ka Kong Bindas Syiem ka la shong shah thngan hakhmat ka Additional Secretariat ha ka 10 tarik u bnai Jylliew 2024, pyrshah ïa ki briew jong ka Pynursla Constituency.
Ha katei ka dur khih ba la pynmih da katei ka rynsan pathai khubor shimet, utei u rangbah u la ai jingkren ha katei ka jaka shong shah thngan jong ka Kong Bindas Syiem ha kaba u la ong ba ka Nongpoh kam dei kum ka shnong Pynursla ban shah pynbiej ha u nongmihkhmat, u Bah Prestone Tynsong.
Halor kine ki jingkren jong une u rangbah na Umden-Nongpoh, na ka liang ki nongïalam jong ka FORMLD ha ka Sngi Ba-ar jong ka 18 tarik u bnai Jylliew 2024, ki la mih shakhmat ban pynpaw ïa ka jingpynrem jur halor kane ka jingkren jong une u rangbah na Umden Nongpoh da kaba dawa ruh ba utei u rangbah u dei ban pynshai bad ban panmap paidbah halor ka jingkren beiñ jong u hapoh ka artaïew lym kumta kane ka kynhun kam banse ban shim noh da kiwei ki lad ki lynti kiba kham tyngeh pyrshah ïa une u rangbah.
Haba kren sha ki lad pathai khubor, u General Secretary ka FORMLD, Bah Jied Donbor Dkhar, u la ong ba kane ka jingkynthoh jong utei u rangbah ïa ka shnong Pynursla ka la ktah matïong ïa ki paidbah jong ka thaiñ Riwar baroh kawei bad kum ka Dorbar ka pynrem jur ïa kum kine ki jingkren jong utei u rangbah.
“Ka Federation Of Riwar Mihngi Local Dorbar ka la ïathir sani bha halor ka jingkren jong utei u nongkren bad pynpaw ka jingsngewkhia haduh katta-katta bad da kawei ka jingmut, ngi pynrem shisyndon ïa ka jingkren jong utei u briew”, la ong u Bah Dkhar.
U Bah Dkhar u la ong ba ka jingkren jong utei rangbah ka la pynpaw ïa ka jingsngew hanga-mei bad ka jingsngewbaheh bad u la ong ba kino-kino kiba kyrshan ïa utei u briew ban peit poh ïa kiwei pat ki khun Khasi-Khara, kan pynpait pynpra bad pharia ïa ka jingteh song ki khun u Hynñiewtrep-Hynñiewskum.
U Bah Dkhar u la ong ba ka jingdawa jong ka Federation ka long ba utei u rangbah u dei ban panmap paidbah halor ka jingkren jong u hapoh artaïew hynrei lada um leh kumba la dawa, ka Federation kam banse ban shim da kiwei ki sienjam.
“Lada utei u nongkren um leh ïa kaba la dawa, ka Federation kan sa leh ïa kaba donkam”, la ong u Bah Dkhar.
