Shillong, Jylliew 18
U Myntri ka tnad Jngohkai Pyrthei bad uba bat ruh ïa ka tnad Art and Culture ka Sorkar Jylla, Bah Paul Lyngdoh, u la ong katba ka sorkar ka dang treikam katta dang bun kiba kynthoh pyrshah, hynrei kin ïaid beit shakhmat ban shakri ïa ka jylla khnang ban khlaiñ ka pateng ban wan.
Ïa kine ki kyntien u Bah Paul u la pynpaw haba ai jingkren kum u kongsan ha ka jingrakhe dap 14 snem jong ka Meghalaya Filmmakers Association (MeFliMA) kaba dei ka seng ki nongshna bad ak phlim hapoh ka jylla kaba la long ha ka Sngi Ba-ar ha State Central Library Shillong.
Ha kane ka sngi la ïa donlang u Bah Commander Shangpliang kum President ka MeFLiMA, Kong Silbi Passah, ki tyngshop ki puron, ki nongrwai, ki nongshad bad ki ‘riew paidbah kiba la shah khot sngewbha.
Ha ka por 1:00 nohphai sngi ka don ka jingïakop shad ha kaba palat 16 ngut ki hep barit bad ki samla kiba la wan ïashimbynta wat hapdeng ka jingpynwit u slap uba la hap naduh dangstep.
Haba ai jingkren u Bah Paul Lyngdoh u la ong ba hapdeng ka jingtreikam ka sorkar ka mad shibun ki jingkynnoh hynrei ym treikam mynta ka por, ka pateng ban wan kin sa kylli balei ki nongïalam ba mynta ki khlem leh eiei ïa ka jaidbynriew.
“Ka jaidbynriew jong ngi ka la paw ha kiwei ki jylla ha ri India namar ka Shillong Chamber Choir ka la ïoh ban rwai hakhmat u President ka ri America” u la ong.
Shuh shuh u la ïathuh ba ka rynsan jong ka OTT u buh ïa ka thong ba baroh ki phlim Khasi ki dei ban rung lut namar ka dei ka rynsan ban pyni ïa ka sap ka phong jong ki samla.
Ha ka juh ka por ka sorkar ka buh thong ban shna cinema ha man ki district bad ka kwah ban sdang shwa na Shillong.
