Mawkyrwat, Jylliew 18
Haduh 11 tylli ki masi ki la ïap bad 17 tylli kiwei pat ki la mynsaw hadien ka jingshah pom pyrthat ha ka step jong ka Sngi Ba-ar ha ka shnong Rangthong ha South West Khasi Hills District.
La ong ba kane ka jingjia shah pom pyrthat jong katei ka sem masi kaba dei trai da u Bah Tonel Iawphniaw ka la jia ha ka por kumba 3 baje eiei.
Nalor nangta la ong ba ha ka jingther jong u ‘lapbah bajur ha kine ki khyndiat sngi ha South West Khasi Hills District ka la wanrah shibun ki jingjot bad jingjulor jong ki ïing ki sem, ki lynti-syngkien bad ka jingtwa khyndew kaba la ban ïa ki ïing ki sem bad ki surok ka dang ïai bteng haduh ka step jong ka Sngi Ba-ar.
Katkum ki jingtip ba la ïoh lum la ïathuh ba ha ka miet jong ka 17 tarik ha shnong Mawsain ka la don ka jingtwa khyndew ha kaba ar tylli ki ïing ki la shah ban khyndew bad ha kane ka jingjia uwei u briew u la mynsaw na bynta ka lbong bad ka khlieh.
Ki tyllong khubor na ka District Dissater Management Authority ka South West Khasi Hills District ki la ïathuh ba ki ïing kiba la shah pynjot ha ka jingtwa khyndew na ka jingjur jong u slap ki long ha Sarin 2 tylli, Lower Mawpud 2 tylli, Dommawlein 3 tylli bad Nongpdeng Kenbah kawei bad ki briew kiba la shah ktah ki long kumba 40 ngut eiei bad ha kine ki jingjia ym shym la don ba mynsaw.
Shuh shuh ka jingjur jong u slap ka la wanrah ïa ka jinghap khyndew bad hap maw ha kylleng ki jaka ha kaba ka la don ka jingtwa ki surok bad ki lynti ïaid kjat ha surok kaba la bun ka jingshah pynjulor ka long ka surok ban leit sha Nongkenbah bad Sarin bad kawei pat ka surok Rangblang ban leit Wahkaji.
