Shillong, Jylliew 18
Ka Voice of the People Party (VPP) ha ka Sngi Ba-ar ka la leit ban ujor da ka ejahar pyrshah ïa u Myntri ka Sorkar Jylla, u Rakkam A. Sangma halor ka jingkynnoh kynshoit ban wanrah jingsngewpher jaidbynriew hapdeng ki Khasi bad ki Garo.
“Nga tharai phi la ïohi ha ki lad pathai khubor ha kaba u nongaiktien ka seng, Dr. Batskhem Myrboh, u la kren halor ka jingsaphriang jong kawei ka durkhih ha ki rynsan lad pathai. Ha kato ka dur khih, nga tharai baroh ngi la ïohi ba ka jingkren jong u Myntri – lada ngam bakla u la kren ha ka jingïalap ilekshon…u la pyni ïa ka jingïapher jaidbynriew hapdeng ki Khasi bad ki Garo,” la ong u Finance Secretary ka VPP, Bah Danny Langstieh haba kren sha ki lad pathai khubor hadien ka jingïakynduh bad u SP (City).
U Bah Langstieh u la ong ba u Myntri ha ka jingkren jong u, u la kynnoh ruh ba lada ka VPP ka wan ha ka bor synshar, kan sa beh lut ïa ki Garo bad kumne-kumtai.
“Kane ka wanrah ïa ka jingbym sngewtynnad hapdeng ka imlang-sahlang, ka wanrah ka jingsyier hapdeng ka jaidbynriew ruh bad ka pynthut ïa ka imlang-sahlang,” u la ong.
Ha kajuh ka por, u la pynkynmaw ba ka Election Commission of India (ECI) ha shuwa, ka la phah ïa ki jingbthah sha baroh ki nongïakhun bad nongïalap ilekshon ba ha ka por ïalap ilekshon ne ha kano-kano ka por, ym dei ban pynmih ne kren ïa kino-kino ki kyntien kiba wanrah ïa ka jingisih.
Haba kylli, u la ong ba ïa katei ka durkhih la ïoh hadien ba la kut ka ilekshon bad kumta hap ïaid lyngba na ka tnad pulit.
“Jin da ka mih ha ka por ilekshon, ngi la leit ujor beit sha ka ECI. Myntan, ngi dang ïakren ïa kajuh hi bad u SP,” u la ong.
U la pynsngew ba ka seng ka la kdew ba ha ka kyndon 153 (A), 153 (B) bad ka kyndon 505 jong ka IPC, ka tnad ka dei ban pynngat mukotduma ïa kane ka kam.
“U SP u la ong ba ka tnad kan sa sdang ban ïaid shakhmat bad ka jingtohkit. Ngi la kren ruh halor ka jinglong shisha jong kane durkhih bad ngi la aiti beit sha ka aiñ ba kan peit haduh katno ka long kaba shisha,” u la ong.
Haba jubab, u la ong ba ki durkhih kiba mih ki la don lang ryngkat ka jingpynkylla ktien bad ka seng ka la leh ïa ka ‘homework’ ban pynshisha la ki ktien kiba mih na shyntur u Myntri ki dei ne em kiba shisha.
Shuh shuh u la bynrap, “Phi la ïohsngew hi na u nongaiktien ka seng ba kane ka pynhiar dor shibun ba kat u Myntri un kren kum ïa kine ki jait ktien. Kum u Myntri u dei ban kren halor ka imlang-sahlang, ka shong suk shong shngaiñ hynrei une u wanrah pynban ïa ka jingïapher jaidbynriew hapdeng ki Khasi bad Garo.”
“Ngi baroh ngi dang kwah ban ïatylli hynrei hangne pat u wan ban pyni ba tang ban jop ïa ka ilekshon, u wan pyni pynban ïa ka jingsngewpher jaidbynriew,” la ong u Bah Langstieh.
