Shillong, Jylliew 18
Ka ilekshon MLA shiteng samoi ban jied nongmihkhmat thymmai na Gambegre konstitwensi ka lah ban long ryngkat bad ka ilekshon MLA ha Haryana bad Maharashtra mynta u snem.
Ka ilekshon MLA ha Haryana bad Maharashtra kan long ha u bnai Risaw mynta u snem.
Ka tyllong khubor ka ïathuh ba ka Election Commission of India kam lah shuh ban pynlong ïa ka ilekshon shiteng samoi ha Gambegre konstitwensi ha ryngkat bad ki 13 tylli ki konstitwensi kiba don ha ki 7 tylli ki Jylla jong ka ri ha kaba ka jingthep ‘vote’ kan long ha ka 10 tarik Naitung, 2024.
Ki 13 tylli ki MLA konstitwensi ki ban leit sha ka ilekshon shiteng samoi ha ka 10 tarik Naitung ki kynthup ïa ka Raiganj, Ranaghat Dakshin, Bagda, bad Maniktala konstitwensi ha West Bengal nalor ka Dehra, Hamirpur, bad Nalagarh konstitwensi ha Himachal Pradesh. Kiwei pat ki konstitwensi ban pynlong ïa ka ilekshon MLA shiteng samoi ki long ka Jalandhar West ha Punjab, ka Badrinath bad Manglaur konstitwensi ha Uttrakhand, nalor ka Amarwara ha Madhya Pradesh, ka Rupauli konstitwensi ha Bihar bad ka Vikravandi konstitwensi ha Tamil Nadu.
Ka jingñiew ‘vote’ ha kine 13 tylli ki konstitwensi kan long ha ka 13 tarik u Naitung.
Ka tyllong khubor na ka shlem treikam u Chief Electoral Officer (CEO) ka Meghalaya ka ïathuh ba ïa ka jingpyntip la dep phah sha ka Election Commission ha kaba ïadei bad ka jingthylli ka Gambegre konstitwensi hadien ka jingiehnoh kam u Saleng A Sangma kum u MLA.
U Saleng u la iehnoh kam kum u MLA ka Gambegre ha ka 10 tarik u Jylliew 2024 hadien ba u la shahjied kum u MP ka Tura parliamentary konstitwensi.
Ka ilekshon MLA shiteng samoi ha Gambegre hap ban pynlong hapoh hynriew bnai naduh ka sngi ba u MLA u la iehnoh kam.
