Shillong, Jylliew 18
Ha ka Sngi Ba-ar, kawei ka longkmie kaba dei ka nongkhaïi drok ka la shah kem noh ha ki pulit na ka thaiñ IGP ha Shillong bad na ka met jong ka, la ïoh ban kurup ki dawai kuli ‘Yaba Tablets’.
Kane ka jingïoh kem ïa katei ka longkmie ka la long hadien ka jingïoh ïa ka jingtip kaba bniah, ha kaba ki pulit ka tnat Special Cell jong ka East Khasi Hills District ki la pynap shrip ïa kane ka briew bad ki la ïoh ban bat ïa ka na kawei ka taksi kamai.
Hadien ba la kem bad talasi na kane ka longkmie, ki pulit ki la ïoh ban kurup haduh 1776 tylli ki dawai kuli Yaba. La ïathuh ba kane ka briew ka la kiew kali najan ka khyrdop jong ka Shillong Civil Hospital da ka jingthmu ban hiar sha ka thaiñ Khyndailad.
